పనిచేసే జనాభాలో తెలుగు రాష్ట్రాలు టాప్.. దేశంలోనే రెండో స్థానంలో తెలంగాణ.. మూడో స్థానంలో ఏపీ

భారతదేశం యువశక్తితో కళకళలాడుతోంది. దేశంలో పనిచేసే వయసు (15-59 ఏళ్లు) జనాభా గణనీయంగా పెరిగింది. ఈ విషయంలో తెలుగు రాష్ట్రాలు దేశంలోనే అగ్రస్థానాల్లో నిలిచాయి. అత్యధికంగా పనిచేసే వయసు జనాభా ఉన్న రాష్ట్రాల జాబితాలో తెలంగాణ రెండో స్థానంలో, ఆంధ్రప్రదేశ్ మూడో స్థానంలో నిలిచినట్లు నమూనా నమోదు వ్యవస్థ (ఎస్ఆర్ఎస్) గణాంక నివేదిక 2023 వెల్లడించింది.

ఎస్ఆర్ఎస్ నివేదిక ప్రకారం దేశ మొత్తం జనాభాలో ఏకంగా మూడింట రెండు వంతుల (66 శాతం) మంది పనిచేసే వయసు విభాగంలోనే ఉన్నారు. ఇదే సమయంలో 0-14 ఏళ్ల వయసున్న చిన్నారుల జనాభా 24.2 శాతానికి పరిమితమైంది. ఇది దేశంలో జనాభా స్వరూపం మారుతోందనడానికి సంకేతంగా నిపుణులు విశ్లేషిస్తున్నారు.

రాష్ట్రాల వారీగా చూస్తే, దేశ రాజధాని ఢిల్లీ 70.8 శాతం పనిచేసే వయసు జనాభాతో మొదటి స్థానంలో ఉంది. ఆ తర్వాతి స్థానాల్లో తెలంగాణ (70.2 శాతం), ఆంధ్రప్రదేశ్ (70.1 శాతం) నిలవడం విశేషం. ఈ గణాంకాలు తెలుగు రాష్ట్రాల్లో ఉత్పాదకతకు, అభివృద్ధికి అందుబాటులో ఉన్న మానవ వనరుల సామర్థ్యాన్ని సూచిస్తున్నాయి.

గ్రామీణ, పట్టణ ప్రాంతాల మధ్య కూడా ఈ జనాభాలో వ్యత్యాసం స్పష్టంగా కనిపించింది. పట్టణ ప్రాంతాల్లో పనిచేసే వయసు జనాభా 68 శాతంగా ఉండగా, గ్రామీణ ప్రాంతాల్లో ఇది 64 శాతంగా నమోదైనట్లు ఎస్ఆర్ఎస్ నివేదిక పేర్కొంది. ఈ డెమోగ్రాఫిక్ డివిడెండ్ (జనాభా ప్రయోజనం) దేశ ఆర్థిక వ్యవస్థకు ఒక సానుకూల అంశమని, అయితే ఈ యువశక్తికి తగిన ఉపాధి అవకాశాలు కల్పించడం ప్రభుత్వాలకు ఒక సవాల్ అని విశ్లేషకులు అభిప్రాయపడుతున్నారు.