భారత్‌తో మ్యాచ్‌లో ఫైరింగ్ చేయండి.. పాక్ టీవీ ఛానెల్‌లో దారుణ వ్యాఖ్యలు!

ఆసియా కప్ 2025 టోర్నీలో భాగంగా భారత్, పాకిస్థాన్ మధ్య జరిగిన సూపర్ ఫోర్ మ్యాచ్ మరోసారి తీవ్ర ఉద్రిక్తతలకు దారితీసింది. మైదానంలో ఆటగాళ్ల మధ్య మాటల యుద్ధం జరిగితే, పాకిస్థాన్‌కు చెందిన ఓ టీవీ ఛానెల్‌లో జరిగిన చర్చ తీవ్ర దుమారం రేపింది. భారత్‌తో మ్యాచ్‌లో ఓటమి ఖాయమని తేలిపోవడంతో మన ఆటగాళ్లు ఫైరింగ్ చేసి మ్యాచ్‌ను ఆపేయాలంటూ ఓ ప్యానలిస్ట్ చేసిన వ్యాఖ్యలు తీవ్ర వివాదాస్పదమయ్యాయి.

పాకిస్థాన్‌లోని ఓ టీవీ ఛానెల్‌లో మ్యాచ్‌పై జరిగిన చర్చ సందర్భంగా ఈ దారుణ ఘటన చోటుచేసుకుంది. చర్చలో యాంకర్ ఒకరు, "మన కుర్రాళ్లు ప్రాణం పెట్టి ఆడితే ఇక్కడి నుంచి గెలవగలరా?" అని ప్యానలిస్టును ప్రశ్నించారు. దీనికి స్పందించిన ఓ ప్యానలిస్ట్, "నా ఉద్దేశంలో వాళ్లు ప్రాణం పెట్టి ఆడాలి. లేదంటే మన కుర్రాళ్లు ఫైరింగ్ చేసి మ్యాచ్‌ను ముగించాలి. ఎందుకంటే మనం ఓడిపోవడం ఖాయం" అంటూ అత్యంత వివాదాస్పద వ్యాఖ్యలు చేశాడు. 

క్రీడాస్ఫూర్తికి విరుద్ధంగా ఇలాంటి హింసాత్మక వ్యాఖ్యలు చేయడమే కాకుండా, ఆ తర్వాత ఆయన నవ్వడం మరింత దిగ్భ్రాంతికి గురిచేసింది. ఈ చర్చలో పాకిస్థాన్ మాజీ క్రికెటర్లు బసిత్ అలీ, కమ్రాన్ అక్మల్ కూడా ఉండటం గమనార్హం. ప్రస్తుతం ఈ వీడియో సోషల్ మీడియాలో వైరల్‌గా మారి, తీవ్ర విమర్శలకు దారితీస్తోంది.