వాహన ప్రియులకు పండగే.. అమల్లోకి జీఎస్టీ 2.0.. బైకులపై భారీ తగ్గుదల!

దేశంలోని వాహన కొనుగోలుదారులకు అతిపెద్ద శుభవార్త. ఎంతోకాలంగా ఎదురుచూస్తున్న జీఎస్టీ 2.0 నేటి నుంచి అమల్లోకి వచ్చింది. ఈ కొత్త పన్ను విధానం కారణంగా కార్లు, ద్విచక్ర వాహనాల ధరలు భారీగా తగ్గాయి. సాధారణ హ్యాచ్‌బ్యాక్ కార్లపై సుమారు రూ. 40,000 నుంచి మొదలుకొని, అత్యంత ఖరీదైన లగ్జరీ ఎస్‌యూవీలపై ఏకంగా రూ. 30 లక్షల వరకు ధరలు తగ్గడంతో ఆటోమొబైల్ రంగంలో సరికొత్త ఉత్తేజం కనిపిస్తోంది.

సామాన్యులకు ఊరటనిచ్చిన బైకుల ధరలు
భారతదేశంలో 98 శాతం మార్కెట్ వాటా కలిగిన 350సీసీ లోపు ద్విచక్ర వాహనాలపై జీఎస్టీని 28 శాతం నుంచి 18 శాతానికి తగ్గించడం సామాన్యులకు పెద్ద ఊరట. దీంతో హీరో స్ప్లెండర్, బజాజ్ పల్సర్, టీవీఎస్ అపాచీ, రాయల్ ఎన్‌ఫీల్డ్ క్లాసిక్ 350 వంటి అత్యధికంగా అమ్ముడయ్యే బైకుల ధరలు గణనీయంగా తగ్గుతాయి. హోండా తన యాక్టివా స్కూటర్‌పై సుమారు రూ. 7,874, షైన్ బైక్‌పై రూ. 7,443 వరకు తగ్గింపును ప్రకటించింది. ఈ ధరల తగ్గింపు పండుగ సీజన్‌లో అమ్మకాలను మరింత పెంచుతుందని మార్కెట్ నిపుణులు అంచనా వేస్తున్నారు.