యునెస్కో తాత్కాలిక జాబితాలో ఏపీకి పెద్దపీట.. తిరుమల కొండలు, విశాఖ ఎర్రమట్టి దిబ్బలకు గుర్తింపు

ఆంధ్రప్రదేశ్‌కు చెందిన రెండు ప్రఖ్యాత సహజ సంపదలకు అంతర్జాతీయ స్థాయిలో అరుదైన గౌరవం దక్కింది. తిరుమల కొండలు, విశాఖపట్నం సమీపంలోని ఎర్రమట్టి దిబ్బలు యునెస్కో ప్రపంచ వారసత్వ ప్రదేశాల తాత్కాలిక జాబితాలో చోటు దక్కించుకున్నాయి. దేశవ్యాప్తంగా మొత్తం ఏడు సహజ, సుందర ప్రదేశాలకు ఈ జాబితాలో స్థానం లభించడం విశేషం.

ఈ కొత్త చేరికలతో భారతదేశంలోని తాత్కాలిక వారసత్వ ప్రదేశాల సంఖ్య 62 నుంచి 69కి పెరిగిందని కేంద్ర సాంస్కృతిక మంత్రిత్వ శాఖ ఒక ప్రకటనలో అధికారికంగా వెల్లడించింది. యునెస్కో గుర్తింపు పొందిన ప్రదేశాల తుది జాబితాలో చేరడానికి తాత్కాలిక జాబితాలో స్థానం పొందడం మొదటి, కీలకమైన అడుగు.

ఆంధ్రప్రదేశ్‌లోని తిరుమల కొండలు, ఎర్రమట్టి దిబ్బలతో పాటు, మహారాష్ట్రలోని పంచగని, మహాబలేశ్వర్‌లలో ఉన్న దక్కన్ ట్రాప్స్, కర్ణాటకలోని సెయింట్ మేరీస్ ద్వీపం, మేఘాలయలోని గుహలు, నాగాలాండ్‌లోని నాగా హిల్ ఓఫియోలైట్, కేరళలోని వర్కల క్లిఫ్స్ కూడా ఈ జాబితాలో ఉన్నాయి.

భారతదేశ అపురూపమైన సహజ, సాంస్కృతిక వారసత్వాన్ని పరిరక్షించి, ప్రోత్సహించడంలో మా నిబద్ధతకు ఈ గుర్తింపు నిదర్శనమని ప్రభుత్వ వర్గాలు తెలిపాయి. తిరుమల కొండల్లోని శిలాతోరణం, ఎపార్కియన్ అన్‌కన్‌ఫర్మిటీ వంటి అరుదైన భౌగోళిక నిర్మాణాలు సుమారు 150 కోట్ల సంవత్సరాల భూమి చరిత్రకు సాక్ష్యాలుగా నిలుస్తున్నాయని నిపుణులు వివరిస్తున్నారు. ఈ చారిత్రక, భౌగోళిక ప్రాముఖ్యత కారణంగానే తిరుమల కొండలకు ఈ ప్రత్యేక గుర్తింపు లభించింది.