'పిక్చర్ అభీ బాకీ హై'.. భారత్-పాక్ పోరుకు ముందు తీవ్ర ఉత్కంఠ

ఆసియా కప్ 2025లో భాగంగా జరగనున్న కీలకమైన భారత్-పాకిస్థాన్ మ్యాచ్‌కు ముందు, క్రికెట్ వ్యూహాల కన్నా షేక్ హ్యాండ్ వివాదమే ప్రధానంగా మారింది. గత మ్యాచ్‌లో భారత ఆటగాళ్లు పాక్ ఆటగాళ్లకు షేక్ హ్యాండ్ ఇవ్వలేదనే ఆరోపణలు తీవ్ర చర్చనీయాంశం కాగా, ఈ అంశంపై పాకిస్థాన్ క్రికెట్ బోర్డు (పీసీబీ) ఐసీసీకి ఫిర్యాదు చేసింది. ఈ నేపథ్యంలో మాజీ కెప్టెన్ మహమ్మద్ అజారుద్దీన్, మాజీ క్రికెటర్ నిఖిల్ చోప్రా భిన్నమైన అభిప్రాయాలు వ్యక్తం చేశారు.

ఈ వివాదాన్ని అజారుద్దీన్ తేలికగా కొట్టిపారేశారు. షేక్ హ్యాండ్ ఇవ్వడంలో ఎలాంటి తప్పులేదని, దీనికి అనవసరంగా ప్రాధాన్యత ఇస్తున్నారని ఆయన అన్నాడు. “ఆట ఆడేటప్పుడు షేక్ హ్యాండ్ ఇవ్వడం లాంటివి సాధారణం. ఇందులో సమస్య ఏముందో నాకు అర్థం కావడం లేదు” అని ఆయన పేర్కొన్నాడు. అంతేకాకుండా, నిరసనగా ఆడాలనుకుంటే అసలు ఆడకపోవడమే మంచిదని, ఒకసారి ఆడాలని నిర్ణయించుకున్నాక పూర్తిస్థాయిలో ఆడాలని ఆయన హితవు పలికాడు.

అయితే, నిఖిల్ చోప్రా దీనిపై భిన్నమైన కోణాన్ని ఆవిష్కరించాడు. మైదానంలో ఆటగాళ్ల మధ్య వాగ్వాదం జరిగి ఉండవచ్చని అనుమానం వ్యక్తం చేశాడు. “ఆట సమయంలో భారత ఆటగాళ్లతో పాక్ ఆటగాళ్లు దురుసుగా మాట్లాడి ఉండవచ్చు. అందుకే గౌతమ్ గంభీర్, సూర్యకుమార్ యాదవ్ లాంటి వాళ్లు జట్టుగా షేక్ హ్యాండ్ ఇవ్వకూడదని నిర్ణయించుకుని ఉండొచ్చు” అని చోప్రా అభిప్రాయపడ్డాడు. ఇలాంటి వివాదాలు ఆటగాళ్ల ఏకాగ్రతను దెబ్బతీస్తాయని, ఐసీసీ టోర్నమెంట్లలో నిరసనలు తెలపడం సరైన పద్ధతి కాదని ఆయన హెచ్చరించాడు.

భారత్-పాక్ మ్యాచ్ అంటేనే అనూహ్య పరిణామాలు ఉంటాయని, "పిక్చర్ అభీ బాకీ హై" అన్నట్లుగా ఉంటుందని చోప్రా వ్యాఖ్యానించాడు. ఇక‌, ఈ షేక్ హ్యాండ్ వివాదం ఇవాళ్టి మ్యాచ్‌పై మరింత ఉత్కంఠను పెంచింది.