టీమిండియా పేసర్లు గాయపడడానికి అసలు కారణం ఇదే: యువీ తండ్రి యోగరాజ్

టీమిండియా ఫాస్ట్ బౌలర్లు తరచూ గాయాల బారిన పడుతుండటంపై భారత మాజీ క్రికెటర్ యువరాజ్ సింగ్ తండ్రి, క్రికెట్ కోచ్ యోగ్‌రాజ్ సింగ్ సంచలన వ్యాఖ్యలు చేశారు. ముఖ్యంగా స్టార్ పేసర్ జస్‌ప్రీత్ బుమ్రా పదేపదే గాయపడటానికి జిమ్‌లో చేసే కఠినమైన కసరత్తులు, బాడీ బిల్డింగ్ మీద పెట్టే శ్రద్ధే కారణమని అన్నారు. ఆధునిక ఫిట్‌నెస్ పద్ధతులపై ఆయన చేసిన ఈ వ్యాఖ్యలు ఇప్పుడు క్రికెట్ వర్గాల్లో పెద్ద చర్చకు దారితీశాయి.

ఫాస్ట్ బౌలర్లకు గాయాలు కావడం సాధారణమే అయినా, కోలుకున్న కొద్ది కాలానికే మళ్లీ గాయపడితే అది వారి కెరీర్‌ను దెబ్బతీస్తుందని యోగ్‌రాజ్ సింగ్ ఆందోళన వ్యక్తం చేశారు. "జస్‌ప్రీత్ బుమ్రా ఇటీవల కాలంలో ఏకంగా నాలుగుసార్లు గాయపడ్డాడు. దీనికి ప్రధాన కారణం అతను జిమ్‌కు వెళ్లడమే. బుమ్రాతో పాటు మరికొందరు క్రికెటర్లు కూడా ఇదే సమస్యతో బాధపడుతున్నారు" అని అన్నారు. క్రికెటర్లకు, ముఖ్యంగా ఫాస్ట్ బౌలర్లకు జిమ్, బాడీ బిల్డింగ్ అవసరం లేదని ఆయన కుండబద్దలు కొట్టారు.

శరీరాన్ని దృఢంగా ఉంచుకోవడానికి జిమ్‌లకు బదులుగా సాంప్రదాయ వ్యాయామ పద్ధతులను అనుసరించాలని యోగ్‌రాజ్ సూచించారు. "ఫాస్ట్ బౌలర్లు యోగా, ప్రాణాయామం వంటివి చేయాలి. ఇవి శరీరాన్ని సహజంగా బలోపేతం చేస్తాయి. కండరాలను దృఢంగా మార్చి, గాయాల ముప్పును తగ్గిస్తాయి" అని ఆయన వివరించారు. బుమ్రా వంటి కీలక బౌలర్లు తమ ఫిట్‌నెస్‌ను జిమ్‌లలో కాకుండా సహజ సిద్ధమైన మార్గాల్లో పెంచుకోవడంపై దృష్టి పెట్టాలని ఆయన పిలుపునిచ్చారు.

బుమ్రాతో పాటు మహమ్మద్ షమీ, హార్దిక్ పాండ్య వంటి కీలక ఆటగాళ్లు కూడా తరచూ గాయాలతో జట్టుకు దూరం కావడం తెలిసిందే. ఈ నేపథ్యంలో యోగ్‌రాజ్ సింగ్ చేసిన వ్యాఖ్యలకు ప్రాధాన్యత ఏర్పడింది. బుమ్రా వంటి ప్రపంచ స్థాయి బౌలర్లు గాయాల బెడద లేకుండా ఉంటే భారత ఫాస్ట్ బౌలింగ్ విభాగం మరింత పటిష్టంగా మారుతుందని ఆయన ఆశాభావం వ్యక్తం చేశారు.