'ఓజీ' ప్రపంచంలోకి 'సత్య దాదా'.. ప్రకాశ్ రాజ్ లుక్ చూశారా?

పవర్ స్టార్ పవన్ కల్యాణ్ హీరోగా, యువ దర్శకుడు సుజీత్ దర్శకత్వంలో రూపొందుతున్న భారీ యాక్షన్ చిత్రం 'ఓజీ'. ఈ సినిమాపై అభిమానుల్లో భారీ అంచనాలు నెలకొన్నాయి. విడుదల తేదీ దగ్గర పడుతుండటంతో చిత్ర బృందం ప్రమోషన్ల వేగాన్ని పెంచింది. తాజాగా ఈ సినిమా నుంచి ఓ కీలక అప్‌డేట్‌ను విడుదల చేసింది. ఈ చిత్రంలో ప్రముఖ నటుడు ప్రకాశ్ రాజ్ పోషిస్తున్న పాత్ర పేరు, ఫస్ట్ లుక్‌ను సోషల్ మీడియా వేదికగా విడుద‌ల చేసింది.

ప్రముఖ నిర్మాణ సంస్థ డీవీవీ ఎంటర్‌టైన్‌మెంట్ తమ అధికారిక సోషల్ మీడియా ఖాతాలో ప్రకాశ్ రాజ్ పోస్టర్‌ను విడుదల చేసింది. ఈ సినిమాలో ఆయన 'సత్య దాదా' అనే శక్తిమంతమైన పాత్రలో కనిపించనున్నట్లు ప్రకటించింది. "విలక్షణ నటుడు ప్రకాశ్ రాజ్‌ను 'ఓజీ'లో ఇలా పరిచయం చేస్తున్నాం" అంటూ పోస్టర్‌కు క్యాప్షన్ ఇచ్చింది. విడుదల చేసిన పోస్టర్‌లో ప్రకాశ్ రాజ్ తనదైన గంభీరమైన లుక్‌తో ఆకట్టుకుంటున్నారు.

ఇక‌, ఇటీవల పవన్ పుట్టినరోజు సందర్భంగా విడుదల చేసిన 'ఓజీ' గ్లింప్స్ వీడియోకు ప్రేక్షకుల నుంచి అద్భుతమైన స్పందన లభించిన విషయం తెలిసిందే. అందులో ప్రతినాయకుడి పాత్రధారి ఓమీ (ఇమ్రాన్ హష్మీ), "నిన్ను కలవాలని, మాట్లాడాలని, చంపాలని ఎదురుచూస్తున్నా" అంటూ ఓజీకి రాసిన లేఖతో యాక్షన్ ఘట్టాలను చూపించారు. ఈ గ్లింప్స్‌లో పవర్ స్టార్ కత్తి పట్టుకుని కనిపించడంతో సినిమాపై అంచనాలు తారస్థాయికి చేరాయి.

ఈ చిత్రంలో పవన్ సరసన హీరోయిన్‌గా ప్రియాంక అరుళ్ మోహన్ నటిస్తుండగా, బాలీవుడ్ నటుడు ఇమ్రాన్ హష్మీ ప్రతినాయకుడిగా, శ్రియా రెడ్డి కీలక పాత్రలో నటిస్తున్నారు. త‌మ‌న్ బాణీలు అందిస్తున్న ఈ చిత్రం ఈ నెల‌ 25న ప్రపంచవ్యాప్తంగా థియేటర్లలోకి రానుంది.