బాలికపై అత్యాచారం: 60 ఏళ్ల వృద్ధుడికి 24 ఏళ్ళ శిక్ష విధిస్తూ నల్గొండ కోర్టు సంచలన తీర్పు

పదేళ్ల బాలికపై లైంగిక దాడికి పాల్పడిన కేసులో 60 ఏళ్ల వృద్ధుడికి న్యాయస్థానం కఠిన శిక్ష విధించింది. నల్గొండ జిల్లాలో సంచలనం సృష్టించిన ఈ ఘటనలో నిందితుడిపై నేరం రుజువు కావడంతో 24 ఏళ్ల కఠిన కారాగార శిక్షతో పాటు జరిమానా విధిస్తూ మంగళవారం కీలక తీర్పు వెలువరించింది.

నల్గొండ మండలం అన్నెపర్తి గ్రామంలో 2023 మార్చి 28న ఈ దారుణం చోటుచేసుకుంది. ఇంట్లో ఎవరూ లేని సమయంలో ఒంటరిగా నిద్రిస్తున్న పదేళ్ల బాలికపై అదే గ్రామానికి చెందిన వృద్ధుడు అత్యాచారానికి పాల్పడ్డాడు. విషయం తెలుసుకున్న బాలిక తల్లిదండ్రులు మరుసటి రోజు నల్గొండ రూరల్ పోలీస్ స్టేషన్‌లో ఫిర్యాదు చేశారు.

తల్లిదండ్రుల ఫిర్యాదు మేరకు కేసు నమోదు చేసుకున్న పోలీసులు, నిందితుడిని అరెస్టు చేసి దర్యాప్తు చేపట్టారు. దాదాపు రెండేళ్లకు పైగా సాగిన విచారణ అనంతరం, సాక్ష్యాధారాలను పరిశీలించిన కోర్టు నిందితుడిని దోషిగా నిర్ధారించింది. ఈ మేరకు అతనికి 24 ఏళ్ల జైలు శిక్షతో పాటు రూ. 40,000 జరిమానా విధించింది. అంతేకాకుండా, బాధితురాలికి ప్రభుత్వం తరఫున రూ. 10 లక్షల నష్టపరిహారం అందించాలని కూడా కోర్టు తన తీర్పులో ఆదేశించింది.