టెక్నాలజీలో అమెరికాపై ఆధారపడొద్దు.. భారత్‌కు జీటీఆర్ఐ తీవ్ర హెచ్చరిక

ప్రస్తుతం నెలకొన్న భౌగోళిక రాజకీయ ఉద్రిక్తతల నడుమ, అమెరికాకు చెందిన టెక్నాలజీ సేవలపై భారత్ అతిగా ఆధారపడటం పెను ప్రమాదానికి దారితీయొచ్చని ప్రముఖ థింక్ ట్యాంక్ గ్లోబల్‌ ట్రేడ్‌ రీసెర్చి ఇనిషియేటివ్‌ (జీటీఆర్ఐ) హెచ్చరించింది. ఏదైనా అనుకోని సందర్భంలో అమెరికా తన సాఫ్ట్‌వేర్, క్లౌడ్ సేవలను నిలిపివేస్తే దేశంలోని బ్యాంకింగ్, పాలన, రక్షణ వంటి కీలక రంగాలు కుప్పకూలే ప్రమాదం ఉందని ఆదివారం విడుదల చేసిన నివేదికలో ఆందోళన వ్యక్తం చేసింది.

అమెరికాకు చెందిన సాఫ్ట్‌వేర్‌లు, క్లౌడ్ టెక్నాలజీ, సోషల్ మీడియా ప్లాట్‌ఫామ్‌లపై మన దేశం అధికంగా ఆధారపడటమే ఈ సమస్యకు మూలకారణమని జీటీఆర్ఐ స్పష్టం చేసింది. భవిష్యత్తులో ఆర్టిఫిషియల్ ఇంటెలిజెన్స్ (ఏఐ) వంటి కొత్త టెక్నాలజీల విషయంలోనూ ఇదే ధోరణి కొనసాగితే, కీలక సమయాల్లో డేటా లేదా టెక్ సేవలు ఆగిపోయే ముప్పు పొంచి ఉంటుందని తెలిపింది.

ఈ సమస్యను అధిగమించేందుకు భారత్ వెంటనే 'డిజిటల్ స్వరాజ్' దిశగా అడుగులు వేయాలని జీటీఆర్ఐ వ్యవస్థాపకుడు అజయ్ శ్రీవాస్తవ సూచించారు. 2030 నాటికి దేశీయ ఆపరేటింగ్ సిస్టమ్ (ఓఎస్), సావరిన్ క్లౌడ్, స్వదేశీ సైబర్ సెక్యూరిటీ వ్యవస్థలను అభివృద్ధి చేసుకోవాలని ఆయన అన్నారు. ప్రభుత్వం ఈ లక్ష్యంతో ఒక ప్రత్యేక మిషన్‌ను ప్రారంభించాల్సిన అవసరం ఉందని అభిప్రాయపడ్డారు.

సొంత టెక్నాలజీని అభివృద్ధి చేసుకునే విషయంలో చైనా, యూరప్ దేశాలు ఇప్పటికే చాలా ముందుకు వెళ్లాయని, భారత్ మాత్రం వెనకబడి ఉందని జీటీఆర్ఐ పేర్కొంది. మన దేశ ప్రజల డేటానే మన అతిపెద్ద బలమని, కానీ ఈ విలువైన డేటా అమెరికా ఏఐ కంపెనీల అభివృద్ధికి, వారి ఆదాయానికి ఇంధనంగా మారుతోందని నివేదికలో ఆందోళన వ్యక్తం చేసింది.