ఇంద్రకీలాద్రిపై దసరా సందడి.. ఏర్పాట్లకు రూ.4కోట్లు ఖర్చు

ఇంద్రకీలాద్రిపై ఈ నెల 22వ తేదీ నుంచి వైభవంగా జరగనున్న దసరా శరన్నవరాత్రుల కోసం కనకదుర్గమ్మ ఆలయ అధికారులు ఏర్పాట్లను ముమ్మరం చేశారు. ఉత్సవాల నిర్వహణకు సంబంధించి సుమారు రూ.4 కోట్ల విలువైన పనులకు టెండర్లు ఖరారు చేసి, కాంట్రాక్టర్లకు అప్పగించారు. కొండ దిగువన రూ.2.54 కోట్లతో, కొండపైన రూ.1.50 కోట్లతో అభివృద్ధి పనులు చేపట్టనున్నారు. అయితే, ఏటా కోట్లాది రూపాయలు వెచ్చిస్తున్నప్పటికీ, చాలా నిర్మాణాలు తాత్కాలికంగానే ఉండటంతో వ్యయంపై విమర్శలు వినిపిస్తున్నాయి.

దసరా ఉత్సవాల కోసం కొండ కింద తాత్కాలిక క్యూ లైన్లు, వాటర్ ప్రూఫ్ షామియానాలు, స్నానఘట్టాల వద్ద షెడ్లు, విద్యుత్ దీపాల అలంకరణ, మైక్ సెట్ల ఏర్పాటు వంటి పనులకు టెండర్లు ఖరారు చేశారు. ఇందులో భాగంగా వినాయకుడి గుడి నుంచి ఘాట్ రోడ్డు వరకు షామియానాల కోసం రూ.27.30 లక్షలు, హంస వాహనం మరమ్మతులకు రూ.7.30 లక్షలు, బాణాసంచా కోసం రూ.5.86 లక్షలు కేటాయించారు. కొండపైన కూడా క్యూ లైన్లు, లైటింగ్, వీఐపీ వాహనాల ఏర్పాటు, పెయింటింగ్ పనుల కోసం కోట్లాది రూపాయలు ఖర్చు చేస్తున్నారు.

చాలా పనులకు సంబంధించి అంచనా విలువ (ఎస్టిమేటెడ్ కాంట్రాక్టు వ్యాల్యూ) కన్నా తక్కువ మొత్తానికే కాంట్రాక్టర్లు టెండర్లు దక్కించుకున్నారు. అయితే, పోలీసుల పర్యవేక్షణ కోసం ఏర్పాటు చేసే తాత్కాలిక సీసీటీవీల టెండర్‌ను మాత్రం అంచనా వ్యయం రూ.7.80 లక్షలు కాగా, 1.40 శాతం అధిక ధరతో రూ.7.91 లక్షలకు ఓ సంస్థకు అప్పగించడం గమనార్హం. శాశ్వత ప్రాతిపదికన క్యూ లైన్లు వంటివి నిర్మించకపోవడంతో ప్రతీ ఏటా తాత్కాలిక పనులకే భారీగా నిధులు వృథా అవుతున్నాయని పలువురు అభిప్రాయపడుతున్నారు.

ఇక భక్తులకు మంచినీటి సరఫరా, తాత్కాలిక టాయిలెట్లు, లగేజీ కౌంటర్ల నిర్వహణ బాధ్యతలను విజయవాడ మున్సిపల్ కార్పొరేషన్‌కు (వీఎంసీ) అప్పగించారు. ఈ పనులకు అయ్యే ఖర్చును వీఎంసీ ముందుగా భరించి, ఆ తర్వాత బిల్లులను దేవస్థానానికి సమర్పిస్తుంది. గత ఏడాది కేవలం మంచినీటి బాటిళ్లు, ప్యాకెట్ల సరఫరా కోసమే దేవస్థానం సుమారు రూ.2 కోట్లు కార్పొరేషన్‌కు చెల్లించింది. ఈ ఏడాది కూడా అదే పద్ధతిలో ఏర్పాట్లు కొనసాగుతున్నాయి.