ఇండిగో విమానానికి తప్పిన ముప్పు... ప్రయాణికుల్లో ఎంపీ డింపుల్ యాదవ్!

సమాజ్‌వాదీ పార్టీ ఎంపీ డింపుల్ యాదవ్ సహా 150 మందికి పైగా ప్రయాణికులతో ఢిల్లీకి బయలుదేరిన ఇండిగో విమానానికి పెను ప్రమాదం తప్పింది. టేకాఫ్ సమయంలో సాంకేతిక లోపం తలెత్తడంతో పైలట్లు అప్రమత్తమై విమానాన్ని రన్‌వేపైనే నిలిపివేశారు. ఈ ఘటన లక్నో విమానాశ్రయంలో చోటుచేసుకుంది.

వివరాల్లోకి వెళితే, ఇండిగోకు చెందిన 6E2111 విమానం లక్నో నుంచి ఢిల్లీకి బయలుదేరాల్సి ఉంది. షెడ్యూల్ ప్రకారం విమానం రన్‌వేపై టేకాఫ్ కోసం వేగంగా వెళుతున్న సమయంలో సిబ్బంది సాంకేతిక సమస్యను గుర్తించారు. వెంటనే స్పందించిన పైలట్లు, ముందుజాగ్రత్త చర్యగా టేకాఫ్‌ను రద్దు చేసి విమానాన్ని తిరిగి టెర్మినల్ వద్దకు తీసుకువచ్చారు. రన్‌వేపై వేగంగా దూసుకెళుతున్న విమానం ఒక్కసారిగా ఆగడంతో ప్రయాణికులు కాసేపు ఆందోళనకు గురయ్యారు. అనంతరం అందరినీ సురక్షితంగా కిందకు దించారు.

ఈ ఘటనపై ఇండిగో సంస్థ ఒక ప్రకటన విడుదల చేసింది. "టేకాఫ్‌కు ముందు రన్‌వేపై ఉండగా మా సిబ్బంది సాంకేతిక సమస్యను గుర్తించారు. దీంతో విమానాన్ని తిరిగి బే వద్దకు తరలించాం" అని అందులో పేర్కొంది. ప్రయాణికుల అసౌకర్యానికి చింతిస్తున్నామని, వారికి ప్రత్యామ్నాయ విమానాన్ని ఏర్పాటు చేశామని తెలిపింది.

కాగా, వారం రోజుల వ్యవధిలో ఇండిగో విమానాల్లో ఇలాంటి ఘటన జరగడం ఇది రెండోసారి. సెప్టెంబర్ 6న కొచ్చి నుంచి అబుదాబి వెళ్లాల్సిన ఇండిగో విమానం (6E 1403) గాల్లోకి ఎగిరిన కొద్దిసేపటికే సాంకేతిక లోపంతో వెనక్కి వచ్చి కొచ్చిలో సురక్షితంగా ల్యాండ్ అయింది. అప్పుడు కూడా ప్రయాణికులకు మరో విమానాన్ని ఏర్పాటు చేశారు. వరుస ఘటనలతో ప్రయాణికుల్లో ఆందోళన వ్యక్తమవుతోంది.