హాంగ్ కాంగ్ ఓపెన్ ఫైనల్లోకి సాత్విక్-చిరాగ్ జోడీ

భారత స్టార్ బ్యాడ్మింటన్ డబుల్స్ జోడీ సాత్విక్‌సాయిరాజ్ రంకిరెడ్డి, చిరాగ్ శెట్టి అద్భుత ప్రదర్శనతో హాంగ్ కాంగ్ ఓపెన్ సూపర్ 500 టోర్నీ ఫైనల్లోకి ప్రవేశించారు. గతంలో ఆరుసార్లు సెమీఫైనల్స్‌లో ఓటమిపాలై నిరాశపరిచిన ఈ జంట, ఈసారి ఆ గండాన్ని దాటి టైటిల్ పోరుకు అర్హత సాధించింది.

శనివారం జరిగిన పురుషుల డబుల్స్ సెమీఫైనల్ మ్యాచ్‌లో ప్రపంచ 9వ ర్యాంకర్లయిన సాత్విక్-చిరాగ్ జోడీ సంపూర్ణ ఆధిపత్యం ప్రదర్శించింది. చైనీస్ తైపీకి చెందిన బింగ్ వెయి లిన్, చెన్ చెంగ్ కౌన్‌ జంటతో జరిగిన ఈ పోరులో భారత క్రీడాకారులు 21-17, 21-15 తేడాతో వరుస గేముల్లో విజయం సాధించారు. తమ అద్భుతమైన ఆటతీరుతో ప్రత్యర్థికి ఏ దశలోనూ పుంజుకునే అవకాశం ఇవ్వకుండా మ్యాచ్‌ను ముగించారు.

ఈ టోర్నీలో 8వ సీడ్‌గా బరిలోకి దిగిన సాత్విక్-చిరాగ్ జోడీ, తమ ప్రయాణంలో నిలకడైన ప్రదర్శన కనబరుస్తోంది. ఇప్పటికే ప్రపంచ ఛాంపియన్‌షిప్స్‌లో కాంస్య పతకం సాధించిన ఈ జంట, సైనా నెహ్వాల్, పీవీ సింధు తర్వాత భారత బ్యాడ్మింటన్‌లో కీలకమైన విజయాలు సాధిస్తున్న క్రీడాకారులుగా గుర్తింపు పొందారు. ఈ టోర్నీలోనూ టైటిల్ గెలిచి తమ సత్తా చాటాలని పట్టుదలగా ఉన్నారు.