భారత్‌తో బంధం మాకు అత్యంత కీలకం: భారత్‌లో అమెరికా తదుపరి రాయబారి కీలక వ్యాఖ్యలు

ప్రపంచంలో అమెరికాకు అత్యంత ముఖ్యమైన సంబంధాలలో భారత్‌ది ఒకటని, భారత్ ఒక కీలక వ్యూహాత్మక భాగస్వామి అని డొనాల్డ్ ట్రంప్ ప్రభుత్వం స్పష్టం చేసింది. భారత్‌లో అమెరికా తదుపరి రాయబారిగా అధ్యక్షుడు ట్రంప్ నామినేట్ చేసిన సెర్గియో గోర్, తన నియామకానికి సంబంధించిన సెనేట్ విచారణలో ఈ కీలక వ్యాఖ్యలు చేశారు. భారత్ ప్రస్థానం కేవలం ఆ ప్రాంతాన్నే కాకుండా యావత్ ప్రపంచ గమనాన్ని నిర్దేశిస్తుందని ఆయన అన్నారు.

సెనేట్ విచారణలో సెర్గియో గోర్ మాట్లాడుతూ, తాను రాయబారిగా బాధ్యతలు చేపట్టిన తర్వాత భారత్‌తో రక్షణ, ఆర్థిక సంబంధాలను మరింత బలోపేతం చేయడంపై ప్రధానంగా దృష్టి సారిస్తానని హామీ ఇచ్చారు. "భౌగోళికంగా భారత్ స్థానం, దాని ఆర్థిక వృద్ధి, సైనిక సామర్థ్యాలు ఆ దేశాన్ని ప్రాంతీయ స్థిరత్వానికి మూలస్తంభంగా నిలబెట్టాయి. ఇరు దేశాల ఉమ్మడి భద్రతా ప్రయోజనాలను, శ్రేయస్సును ముందుకు తీసుకెళ్లడంలో భారత్ పాత్ర ఎంతో కీలకం" అని ఆయన వివరించారు. రక్షణ సహకారం, న్యాయమైన వాణిజ్యం, ఇంధన భద్రత, సాంకేతిక రంగాలలో పురోగతి సాధించడమే తన లక్ష్యమని గోర్ పేర్కొన్నారు.

రక్షణ రంగంలో సహకారాన్ని మరింతగా పెంచుతామని గోర్ స్పష్టం చేశారు. "సంయుక్త సైనిక విన్యాసాల విస్తరణ, రక్షణ వ్యవస్థల సహ-అభివృద్ధి, సహ ఉత్పత్తి, కీలకమైన రక్షణ ఒప్పందాలను పూర్తి చేయడం వంటి అంశాలకు నేను అధిక ప్రాధాన్యత ఇస్తాను" అని ఆయన తెలిపారు. 140 కోట్ల జనాభా, వేగంగా వృద్ధి చెందుతున్న మధ్యతరగతి ప్రజానీకం కలిగిన భారత్... అమెరికాకు అపారమైన అవకాశాలను అందిస్తోందని అన్నారు. ఆర్టిఫిషియల్ ఇంటెలిజెన్స్ నుంచి ఫార్మాస్యూటికల్స్, కీలక ఖనిజాల వరకు అనేక రంగాల్లో కలిసి పనిచేసేందుకు విస్తృత అవకాశాలు ఉన్నాయని ఆయన అభిప్రాయపడ్డారు.

అమెరికా విదేశాంగ మంత్రి మార్కో రూబియో మాట్లాడుతూ, అమెరికా-భారత్ సంబంధాలు అసాధారణ మార్పుల దశలో ఉన్నాయని, ఇది ప్రపంచంలోనే అమెరికాకు ఉన్న అగ్రశ్రేణి బంధాలలో ఒకటని అన్నారు. మరోవైపు, గోర్ నామినేషన్‌ను అమెరికాలోని భారత రాయబారి వినయ్ క్వాత్రా స్వాగతించారు. అధ్యక్షుడు ట్రంప్ తన అత్యంత విశ్వసనీయ సహాయకుడిని భారత్‌కు పంపడం ఇరు దేశాల మధ్య స్నేహ బంధాలను మరింత పటిష్ఠం చేయాలన్న నిబద్ధతకు నిదర్శనమని ఆయన ఎక్స్ వేదికగా పేర్కొన్నారు.