మా వ్యవహారాల్లో తలదూర్చవద్దు.. అమెరికాకు చైనా తీవ్ర హెచ్చరిక

తమ అంతర్గత వ్యవహారాల్లో జోక్యం చేసుకోవద్దని, తమను నియంత్రించే ప్రయత్నాలు మానుకోవాలని అమెరికాకు చైనా గట్టి హెచ్చరికలు జారీ చేసింది. తైవాన్‌ను ఒక పావుగా వాడుకోవద్దని తీవ్ర స్వరంతో స్పష్టం చేసింది. ఇరు దేశాల రక్షణ మంత్రుల మధ్య నిన్న జరిగిన వర్చువల్ సమావేశంలో ఈ కీలక పరిణామం చోటుచేసుకుంది.

అమెరికా రక్షణ మంత్రి పీట్ హెగ్సేత్, చైనా రక్షణ మంత్రి డాంగ్ జున్‌ల మధ్య జరిగిన ఈ చర్చల్లో పలు కీలక అంశాలు ప్రస్తావనకు వచ్చాయి. ఈ సందర్భంగా చైనా రక్షణ మంత్రి డాంగ్ జున్ మాట్లాడుతూ... "తైవాన్ మా భూభాగంలో అంతర్భాగం. స్వాతంత్ర్యానికి మద్దతు ఇస్తున్నామనే పేరుతో తైవాన్‌ను అడ్డుపెట్టుకుని చైనాను కట్టడి చేయాలని చూస్తే సహించబోం" అని అమెరికాను హెచ్చరించారు.

 కొన్ని దేశాలు దక్షిణ చైనా సముద్రంలో కావాలనే రెచ్చగొట్టే చర్యలకు పాల్పడుతున్నాయని, బయటి శక్తులు అశాంతిని సృష్టించేందుకు చేసే ప్రయత్నాలను తీవ్రంగా ఖండిస్తున్నామని ఆయన తెలిపారు. అయితే, ఒకరి ప్రయోజనాలను మరొకరు గౌరవించుకుంటూ సమానమైన, శాంతియుత సైనిక సంబంధాలకు తాము సిద్ధంగా ఉన్నామని డాంగ్ జున్ స్పష్టం చేశారు.

ఈ చర్చలపై అమెరికా రక్షణ శాఖ (పెంటగాన్) ప్రతినిధి సీన్ పార్నెల్ స్పందించారు. చైనాతో చర్చలు ఫలప్రదంగా జరిగాయని ఆయన పేర్కొన్నారు. తమ దేశ రక్షణ మంత్రి పీట్ హెగ్సేత్ మాట్లాడుతూ, బీజింగ్‌తో ఎలాంటి వివాదాన్ని అమెరికా కోరుకోవడం లేదని, చైనాలో పాలన మార్పును ఆశించడం లేదని స్పష్టం చేసినట్లు పార్నెల్ వివరించారు. అదే సమయంలో, ఆసియా-పసిఫిక్ ప్రాంతంలో చైనా ఆధిపత్య ధోరణిని హెగ్సేత్ ఖండించారని తెలిపారు. తైవాన్ జలసంధిలో శాంతికి తాము కట్టుబడి ఉన్నామని, అంతర్జాతీయ జలాల్లో స్వేచ్ఛాయుత ప్రయాణ హక్కు అందరికీ ఉంటుందని ఆయన పునరుద్ఘాటించారు.

భవిష్యత్తులోనూ చర్చలు కొనసాగించేందుకు ఇరుపక్షాల మంత్రులు అంగీకరించారు. ఇదిలావుండగా, రష్యా నుంచి చమురు కొనుగోళ్ల విషయంలో భారత్‌, చైనాలపై అమెరికా అధ్యక్షుడు ట్రంప్ అసంతృప్తితో ఉన్న నేపథ్యంలో ఈ భేటీ జరగడం ప్రాధాన్యత సంతరించుకుంది.