యూఎస్ ఓపెన్ సబలెంకదే.. పదేళ్ల తర్వాత అరుదైన రికార్డు

బెలారస్ టెన్నిస్ స్టార్, వరల్డ్ నంబర్ వన్ అరీనా సబలెంక యూఎస్ ఓపెన్‌లో చరిత్ర సృష్టించింది. శనివారం జరిగిన మహిళల సింగిల్స్ ఫైనల్లో అద్భుతమైన ఆటతీరుతో అమెరికా క్రీడాకారిణి అమందా అనిసిమోవాను ఓడించి వరుసగా రెండోసారి ఛాంపియన్‌గా నిలిచింది. దశాబ్దం క్రితం సెరెనా విలియమ్స్ తర్వాత ఈ ఘనత సాధించిన తొలి మహిళా క్రీడాకారిణిగా సబలెంక రికార్డు నెలకొల్పింది. ఆర్థర్ యాష్ స్టేడియంలో జరిగిన ఉత్కంఠభరితమైన తుది పోరులో సబలెంక 6-3, 7-6 (3) తేడాతో విజయం సాధించింది. ఇది ఆమె కెరీర్‌లో నాలుగో గ్రాండ్‌స్లామ్ టైటిల్ కావడం విశేషం.

మ్యాచ్ ఆరంభం నుంచి తన పవర్‌ఫుల్ గేమ్‌తో ఆధిపత్యం ప్రదర్శించిన సబలెంక, తొలి సెట్‌ను సునాయాసంగా గెలుచుకుంది. అయితే, రెండో సెట్‌లో అసలైన నాటకీయత చోటుచేసుకుంది. ఒక దశలో 5-4 ఆధిక్యంతో టైటిల్ గెలుపునకు చేరువైన సబలెంక, సర్వీస్ చేస్తూ మ్యాచ్‌ను ముగించే క్రమంలో ఒత్తిడికి గురైంది. ఒక సులువైన ఓవర్‌హెడ్ షాట్‌ను నెట్‌కు కొట్టి కీలకమైన పాయింట్‌ను కోల్పోయింది. 

ఈ అవకాశాన్ని అందిపుచ్చుకున్న అనిసిమోవా, సబలెంక సర్వీస్‌ను బ్రేక్ చేసి స్కోరును 5-5తో సమం చేసింది. దీంతో స్టేడియంలోని సుమారు 24,000 మంది స్థానిక ప్రేక్షకులు ఆమెకు మద్దతుగా నినాదాలు చేశారు. మ్యాచ్ టై బ్రేకర్‌కు దారితీయడంతో తీవ్ర ఉత్కంఠ నెలకొంది. అయితే, కీలక సమయంలో పుంజుకున్న సబలెంక తన అనుభవాన్ని ఉపయోగించి టై బ్రేకర్‌లో ఆధిపత్యం చెలాయించి మ్యాచ్‌ను, టైటిల్‌ను సొంతం చేసుకుంది. 

ఈ ఏడాది ఆస్ట్రేలియన్ ఓపెన్, ఫ్రెంచ్ ఓపెన్ ఫైనల్స్‌లో ఓటమిపాలైన సబలెంకకు ఈ విజయం ఎంతో ఊరటనిచ్చింది. వర్షం కారణంగా మ్యాచ్‌ను మూసివేసిన పైకప్పు కింద (ఇండోర్) నిర్వహించారు. ఈ పరిస్థితులు ఇద్దరు పవర్ హిట్టర్లకు అనుకూలంగా మారడంతో ప్రారంభం నుంచే పవర్‌ఫుల్ సర్వీస్‌లు, గ్రౌండ్‌స్ట్రోక్‌లతో హోరాహోరీగా తలపడ్డారు.