ఇమ్రాన్ సోదరిపై కోడిగుడ్డుతో దాడి చేసిన సొంత పార్టీ కార్యకర్త.. జైలు బయట అనూహ్య ఘటన!

పాకిస్థాన్ రాజకీయాల్లో ఓ అనూహ్య ఘటన చోటుచేసుకుంది. మాజీ ప్రధాని ఇమ్రాన్ ఖాన్ సోదరి అలీమా ఖానుమ్‌పై సొంత పార్టీకి చెందిన ఓ మహిళ కోడిగుడ్డుతో దాడి చేయడం సంచలనంగా మారింది. రావల్పిండిలోని అడియాలా జైలు వెలుపల ఈ సంఘటన జరిగింది. ఈ దాడికి సంబంధించిన వీడియో సోషల్ మీడియాలో వైరల్ అవుతోంది.

తోషాఖానా కేసుకు సంబంధించి అడియాలా జైలులో జరుగుతున్న విచారణకు అలీమా ఖానుమ్ హాజరయ్యారు. విచారణ ముగిసిన అనంతరం ఆమె జైలు బయట మీడియా ప్రతినిధులతో మాట్లాడుతున్నారు. అదే సమయంలో, జనంలోంచి వచ్చిన ఓ మహిళ ఆమెపైకి కోడిగుడ్డు విసిరింది. ఈ ఆకస్మిక పరిణామంతో అక్కడున్న వారంతా ఒక్కసారిగా షాక్‌కు గురయ్యారు.

ఈ దాడి జరిగిన వెంటనే అలీమా పక్కనే ఉన్న ఓ మహిళ "ఎవరు ఈ పని చేసింది?" అంటూ తీవ్ర ఆగ్రహం వ్యక్తం చేశారు. అయితే, అలీమా ఖానుమ్ మాత్రం ఎంతో సంయమనంతో స్పందించారు. "పర్లేదు, వదిలేయండి" అంటూ వారిని శాంతపరిచారు. రంగంలోకి దిగిన పోలీసులు వెంటనే దాడికి పాల్పడిన మహిళతో పాటు, ఆమెతో ఉన్న మరో మహిళను అదుపులోకి తీసుకున్నారు.

పోలీసుల విచారణలో ఆసక్తికరమైన విషయం వెలుగులోకి వచ్చింది. దాడి చేసిన మహిళలు ఇమ్రాన్ ఖాన్ స్థాపించిన పాకిస్థాన్ తెహ్రిక్-ఈ-ఇన్సాఫ్ (పీటీఐ) పార్టీ సభ్యులేనని తేలింది. ఓ జర్నలిస్టు అడిగిన ప్రశ్నకు అలీమా సమాధానం చెప్పలేదన్న ఆగ్రహంతోనే తాము దాడి చేసినట్లు వారు పోలీసులకు వివరించారు. ఈ ఘటనను పీటీఐ మద్దతుదారులు తీవ్రంగా ఖండిస్తున్నారు. సొంత పార్టీ నేత కుటుంబ సభ్యురాలిపై ఇలా ప్రవర్తించడం సరికాదని సోషల్ మీడియాలో పోస్టులు పెడుతున్నారు.