: వినాయకుడి మండపం వద్ద రగడ.. మంత్రి కోమటిరెడ్డి ప్రసంగాన్ని అడ్డుకున్న బీజేపీ.. ఉద్రిక్తత

నల్గొండలో గణేశ్ నవరాత్రి ఉత్సవాల వేదిక వద్ద తీవ్ర ఉద్రిక్తత చోటుచేసుకుంది. నల్గొండ పాతబస్తీలోని ఒకటో నంబర్ వినాయకుడి మండపం వద్ద మంత్రి కోమటిరెడ్డి వెంకట్ రెడ్డి ప్రసంగిస్తుండగా, బీజేపీ నాయకులు, కార్యకర్తలు అడ్డుకున్నారు. పవిత్రమైన పండుగ వేదికపై మంత్రి రాజకీయ ప్రసంగాలు చేయడం ఏమిటని కోమటిరెడ్డిపై బీజేపీ నేతలు తీవ్ర ఆగ్రహం వ్యక్తం చేశారు. ఈ క్రమంలో కాంగ్రెస్, బీజేపీ శ్రేణుల మధ్య మాటామాటా పెరిగి తీవ్ర వాగ్వాదం, తోపులాట చోటుచేసుకున్నాయి. దీంతో ఆ ప్రాంతంలో ఒక్కసారిగా గందరగోళ వాతావరణం నెలకొంది.

వెంటనే రంగంలోకి దిగిన పోలీసులు, ఇరువర్గాలను చెదరగొట్టి పరిస్థితిని అదుపులోకి తెచ్చే ప్రయత్నం చేశారు. ఈ ఘర్షణకు సంబంధించి బీజేపీ నల్గొండ జిల్లా అధ్యక్షుడు నాగం వర్షిత్ రెడ్డిని పోలీసులు అదుపులోకి తీసుకుని, స్థానిక పోలీస్ స్టేషన్‌కు తరలించేందుకు యత్నించారు.

అయితే, తమ నాయకుడి అరెస్టును నిరసిస్తూ బీజేపీ కార్యకర్తలు పోలీసులను అడ్డుకున్నారు. పోలీసుల చర్య ఏకపక్షంగా ఉందని, అధికార పార్టీకి కొమ్ముకాస్తున్నారని వారు తీవ్రస్థాయిలో ఆరోపించారు. అన్యాయంగా అరెస్టులు చేస్తే చూస్తూ ఊరుకోబోమని హెచ్చరించారు. ఈ సందర్భంగా పోలీసులకు, బీజేపీ కార్యకర్తలకు మధ్య తీవ్ర వాగ్వాదం జరిగింది. అనంతరం పోలీసులు వారిని అక్కడి నుంచి పంపించివేసి, పరిస్థితిని అదుపులోకి తెచ్చారు.