ఫ్రాన్స్ లో ప్రేమించుకున్న కేరళ అమ్మాయి, అమెరికా అబ్బాయి... భారత్ లో పెళ్లి!

ప్రేమకు దేశాలు, సంస్కృతులు, భాషలు వంటి హద్దులు ఉండవని మరోసారి నిరూపితమైంది. అమెరికాకు చెందిన యువకుడు, కేరళకు చెందిన యువతి వివాహ బంధంతో ఒక్కటయ్యారు. ఫ్రాన్స్‌లో మొదలైన వీరి ప్రేమకథ, కేరళలోని కొచ్చిలో పెళ్లి పీటల వరకు చేరింది.

వివరాల్లోకి వెళితే, ఎర్నాకుళంకు చెందిన అంజలి, అమెరికా వాసి అయిన రాబర్ట్‌ వెల్స్‌ మూడేళ్ల క్రితం ఫ్రాన్స్‌లో కలుసుకున్నారు. అక్కడ ఉన్నత విద్యాభ్యాసం కోసం వెళ్లిన వీరిద్దరి మధ్య ఏర్పడిన స్నేహం, కొద్దికాలానికే ప్రేమగా మారింది. తమ ప్రేమ విషయాన్ని ఇరు కుటుంబాల పెద్దలకు చెప్పి, వారి అంగీకారం కూడా పొందారు.

ఓనం పండగ సందర్భంగా ఇటీవల అంజలి స్వస్థలమైన ఫోర్ట్ కొచ్చికి వచ్చిన రాబర్ట్, స్థానిక సబ్-రిజిస్ట్రార్ కార్యాలయంలో ప్రత్యేక వివాహ చట్టం కింద ఆమెను పెళ్లాడాడు. ఈ వేడుకలో వధూవరులిద్దరూ కేరళ సంప్రదాయ వస్త్రధారణలో ఆకట్టుకున్నారు. వివాహం అనంతరం రాబర్ట్ స్వయంగా అందరికీ మిఠాయిలు పంచి తన సంతోషాన్ని పంచుకోవడం విశేషం.

తన భర్త రాబర్ట్‌కు భారతీయ సంస్కృతి, ముఖ్యంగా కేరళ వంటకాలంటే చాలా ఇష్టమని అంజలి తెలిపారు. తమ అల్లుడు అమెరికా వ్యక్తి కావడం పట్ల అంజలి తల్లిదండ్రులు ఆనందం వ్యక్తం చేశారు. "మాకు అమెరికా అల్లుడు రావడం చాలా గర్వంగా, సంతోషంగా ఉంది" అని వారు పేర్కొన్నారు.