తొక్కిసలాట బాధితులకు ఆర్సీబీ అండ.. ఒక్కో కుటుంబానికి రూ. 25 లక్షల పరిహారం

ఐపీఎల్ 2025 టైటిల్ గెలిచిన సంబరాల్లో జరిగిన ఘోర విషాదంపై దాదాపు మూడు నెలల మౌనం తర్వాత రాయల్ ఛాలెంజర్స్ బెంగళూరు (ఆర్సీబీ) యాజమాన్యం ఎట్టకేలకు స్పందించింది. తీవ్ర విమర్శల నేపథ్యంలో తొక్కిసలాటలో ప్రాణాలు కోల్పోయిన 11 మంది అభిమానుల కుటుంబాలకు అండగా నిలుస్తున్నట్లు ప్రకటించింది. ఒక్కో కుటుంబానికి రూ. 25 లక్షల చొప్పున ఆర్థిక సహాయం అందిస్తున్నట్లు శనివారం అధికారికంగా వెల్లడించింది.

ఈ మేరకు 'ఆర్సీబీ కేర్స్' అనే కొత్త కార్యక్రమాన్ని ప్రారంభిస్తున్నట్లు సోషల్ మీడియాలో ఒక పోస్ట్ ద్వారా తెలిపింది. "జూన్ 4న మా హృదయాలు ముక్కలయ్యాయి. మా ఆర్సీబీ కుటుంబంలోని 11 మంది సభ్యులను కోల్పోయాం. వారి లేని లోటును ఏ సాయమూ పూడ్చలేదు. కానీ ఒక తొలి అడుగుగా, వారి కుటుంబాలకు రూ. 25 లక్షల చొప్పున అందిస్తున్నాం. ఇది కేవలం ఆర్థిక సాయం మాత్రమే కాదు. కరుణ, ఐక్యత, నిరంతర సంరక్షణకు ఇదొక వాగ్దానం" అని ఆర్సీబీ యాజమాన్యం పేర్కొంది.

జూన్ 3న అహ్మదాబాద్‌లోని నరేంద్ర మోదీ స్టేడియంలో పంజాబ్ కింగ్స్‌పై ఆర్సీబీ విజయం సాధించి తొలిసారి ఐపీఎల్ టైటిల్ కైవసం చేసుకుంది. అయితే, ఆ విజయం తెచ్చిన ఆనందం 24 గంటలు కూడా నిలవలేదు. జూన్ 4న బెంగళూరులోని చిన్నస్వామి స్టేడియం వెలుపల ఏర్పాటు చేసిన విజయోత్సవ వేడుకల్లో తీవ్ర గందరగోళం చోటుచేసుకుంది. అభిమానులు భారీ సంఖ్యలో తరలిరావడంతో జరిగిన తొక్కిసలాటలో 11 మంది మరణించగా, 50 మందికి పైగా గాయపడ్డారు.

ఈ విషాదం జరిగి 84 రోజులు గడిచిపోయినా ఆర్సీబీ యాజమాన్యం స్పందించకపోవడంపై సర్వత్రా విమర్శలు వెల్లువెత్తాయి. ప్రజల నుంచి తీవ్ర వ్యతిరేకత, పలు ఫిర్యాదులు, అరెస్టుల తర్వాత ఇప్పుడు ఈ ఆర్థిక సాయం ప్రకటించడాన్ని చాలామంది ఆలస్యంగా జరిగిన నష్ట నివారణ చర్యగానే చూస్తున్నారు. ఈ దుర్ఘటనకు యాజమాన్యం భద్రతా లోపాలే కారణమని కర్ణాటక ప్రభుత్వం కూడా ఆరోపించింది. ఘటన జరిగిన వెంటనే ఒక చిన్న సంతాప సందేశం ఇచ్చి చేతులు దులుపుకున్న ఆర్సీబీ, ఇన్ని రోజులు మౌనంగా ఉండటం అభిమానులను తీవ్ర నిరాశకు గురిచేసింది. గాయపడిన వారికి కూడా తమవంతు మద్దతు అందిస్తామని ఫ్రాంచైజీ హామీ ఇచ్చింది.