భారత ఎకానమీపై ట్రంప్ వ్యాఖ్యలు.. ఆస్ట్రేలియా మంత్రి కీలక వ్యాఖ్యలు

భారత ఆర్థిక వ్యవస్థను ఉద్దేశించి అమెరికా అధ్యక్షుడు డొనాల్డ్ ట్రంప్ చేసిన "డెడ్ ఎకానమీ" అనే విమర్శలను ఆస్ట్రేలియా తీవ్రంగా ఖండించింది. భారత్‌ను తాము అద్భుతమైన అవకాశాలున్న దేశంగా చూస్తున్నామని ఆస్ట్రేలియా వాణిజ్య మంత్రి డాన్ ఫారెల్ స్పష్టం చేశారు. భారత్‌తో ఆర్థిక సంబంధాలను మరింత బలోపేతం చేసుకునేందుకు తమ దేశం ఎంతో ఆసక్తిగా ఉందని ఆయన అన్నారు.

డాన్ ఫారెల్ మాట్లాడుతూ, "భారత్, ఆస్ట్రేలియా రెండూ అభివృద్ధి చెందుతున్న ప్రజాస్వామ్య దేశాలు. భారత్ వంటి దేశాలతో కలిసి పనిచేయాలని, ఇరు దేశాల మధ్య వాణిజ్యం, పెట్టుబడులు పెంచుకోవాలని మేము కోరుకుంటున్నాం. భారత్‌లో మాకు గొప్ప అవకాశాలు కనిపిస్తున్నాయి" అని విలేకరులకు తెలిపారు.

అమెరికా సుంకాల విధింపు విధానాన్ని ఆయన తీవ్రంగా వ్యతిరేకించారు. "మేము స్వేచ్ఛా, న్యాయమైన వాణిజ్యాన్ని నమ్మే దేశం. మా దేశానికి, మా కార్మికులకు శ్రేయస్సు చేకూరాలంటే స్వేచ్ఛా వాణిజ్యమే సరైన మార్గం. అందుకే భారత్‌పై గానీ, ఆస్ట్రేలియాపై గానీ సుంకాలు విధించడాన్ని మేము సమర్థించం" అని ఆయన తేల్చిచెప్పారు.

ఇప్పటికే ఆస్ట్రేలియా విదేశాంగ మంత్రి పెన్నీ వాంగ్ కూడా భారత్ నుంచి దిగుమతయ్యే వస్తువులపై ట్రంప్ ప్రభుత్వం 50 శాతం సుంకాలు విధించడాన్ని తప్పుబట్టారు. ఇప్పుడు వాణిజ్య మంత్రి ఫారెల్ కూడా ఇదే తరహా అభిప్రాయాన్ని వ్యక్తం చేశారు. క్వీన్స్‌లాండ్‌లోని అదానీ మైనింగ్ ప్రాజెక్టులకు మద్దతునిస్తూ, భారత్‌కు యురేనియం ఎగుమతి చేసేందుకు కూడా తాము సిద్ధంగా ఉన్నామని ఆయన పేర్కొన్నారు.

భారత్-ఆస్ట్రేలియా మధ్య ప్రతిపాదిత సమగ్ర ఆర్థిక సహకార ఒప్పందం (సీఈసీఏ) గురించి మాట్లాడుతూ, చర్చల కోసం తమ దేశపు ప్రధాన ప్రతినిధిని ఇప్పటికే న్యూఢిల్లీకి పంపామని, చర్చలు ఫలప్రదంగా సాగాయని ఫారెల్ వివరించారు. భారత వాణిజ్య మంత్రి పీయూష్ గోయల్‌తో తాను ఇప్పటికే రెండుసార్లు జూమ్ ద్వారా మాట్లాడానని, ఈ వారంలో మరోసారి చర్చలు జరపాలని భావిస్తున్నట్లు ఆయన తెలిపారు. పర్యావరణ లక్ష్యాల సాధనకు అవసరమైన కీలక ఖనిజాలు, రేర్ ఎర్త్ నిల్వలు తమ దేశంలో పుష్కలంగా ఉన్నాయని, ఈ అదృష్టాన్ని భారత్‌తో పంచుకోవడానికి సిద్ధంగా ఉన్నామని ఫారెల్ పేర్కొన్నారు.