శ్రియతో ఇప్పటికి కుదిరింది: మంచు మనోజ్

తేజా సజ్జా హీరోగా నటిస్తున్న 'మిరాయ్' సైంటిఫిక్ థ్రిల్లర్‌లో మనోజ్ ప్రతినాయకుడి పాత్ర పోషిస్తున్నారు. తాజాగా హైదరాబాద్‌లోని ప్రసాద్ మల్టీప్లెక్స్‌లో ఈ చిత్ర ట్రైలర్ విడుదల కార్యక్రమం జరిగింది. ఈ కార్యక్రమంలో చిత్ర పరిశ్రమలోని పరిస్థితులపై మనోజ్ చేసిన వ్యాఖ్యలు ఆసక్తికరంగా మారాయి.

మంచు మనోజ్ మాట్లాడుతూ నిర్మాత విశ్వప్రసాద్‌ను ఉద్దేశించి కీలక వ్యాఖ్యలు చేశారు. "కింగ్ ఆఫ్ కంటెంట్ అంటే ఆయనే. ఈ రోజుల్లో ఇండస్ట్రీలో నిలదొక్కుకోవడం చాలా కష్టం. ఎలాంటి మద్దతు లేకుండా వచ్చి, వంద సినిమాలు తీయాలనే లక్ష్యంతో పనిచేస్తున్నారు. ఇలాంటి మొండితనం ఉన్న నిర్మాతను నేను ఎప్పుడూ చూడలేదు" అని కొనియాడారు. "ఇండస్ట్రీలో పెద్ద పెద్ద తిమింగళాలు ఉంటాయి. అలాంటి చోట మీలాంటి వారికే నిలబడటం సాధ్యమవుతుంది" అంటూ ఆయన చేసిన వ్యాఖ్యలు చర్చనీయాంశమయ్యాయి.

అదే వేదికపై హీరోయిన్ శ్రియా శరణ్‌ గురించి కూడా మనోజ్ సరదాగా మాట్లాడారు. "శ్రియ నా ఫేవరేట్ హీరోయిన్. గతంలో మేమిద్దరం కలిసి ఒక సినిమా చేద్దామనుకున్నాం, కానీ కుదరలేదు. చివరికి ఈ సినిమాతో ఆ అవకాశం వచ్చింది. సినిమాలో జరిగిన కొన్ని సంఘటనలకు ఇప్పుడే సారీ చెబుతున్నా" అంటూ నవ్వేశారు. మనోజ్ మాటలకు శ్రియ కూడా చిరునవ్వుతో స్పందించారు. ప్రస్తుతం మనోజ్ చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి.