స్టాలిన్ పై అన్నామలై విమర్శలు

బీహార్‌లో కాంగ్రెస్ అగ్రనేత రాహుల్ గాంధీ చేపట్టిన 'ఓటర్ అధికార్ యాత్ర'కు మద్దతు తెలిపేందుకు తమిళనాడు ముఖ్యమంత్రి ఎంకే స్టాలిన్ వెళ్లడం రాజకీయంగా తీవ్ర దుమారం రేపుతోంది. ఈ పర్యటనపై బీజేపీ తీవ్ర స్థాయిలో విమర్శలు గుప్పిస్తోంది. డీఎంకే గతంలో బీహారీలను కించపరిచేలా చేసిందంటూ ఆరోపిస్తున్న వ్యాఖ్యలను బీజేపీ తెరపైకి తెచ్చి దాడి చేస్తోంది.

నిన్న జరిగిన ఈ యాత్రలో రాహుల్ గాంధీ, ఆర్జేడీ నేత తేజస్వి యాదవ్‌తో కలిసి స్టాలిన్ ఒకే వాహనంపై కనిపించిన ఫొటో సోషల్ మీడియాలో వైరల్ అయింది. దీనిపై బీజేపీ తమిళనాడు మాజీ అధ్యక్షుడు అన్నామలై ఘాటుగా స్పందించారు. గతంలో బీహారీలను ఉద్దేశించి డీఎంకే నేతలు దయానిధి మారన్, స్టాలిన్ కుమారుడు ఉదయనిధి చేసిన వ్యాఖ్యలను ఆయన గుర్తుచేశారు. ఆ వ్యాఖ్యలను ఇప్పుడు బీహార్ ప్రజల ముందు మళ్లీ చేయగలరా? అంటూ ఆయన సవాల్ విసిరారు. స్టాలిన్ బీహార్ పర్యటన కేవలం కపట రాజకీయమని, బీహారీలపై డీఎంకేకున్న అసహనాన్ని కప్పిపుచ్చుకునే ప్రయత్నమేనని అన్నామలై ఆరోపించారు.

ముజఫర్‌నగర్‌లో జరిగిన ఈ యాత్రలో స్టాలిన్‌తో పాటు డీఎంకే ఎంపీ కనిమొళి కూడా పాల్గొన్నారు. ఈ సందర్భంగా రాహుల్, స్టాలిన్, తేజస్వితో ఉన్న ఫొటోను ఆమె సోషల్ మీడియాలో పంచుకున్నారు. "ఈ ముగ్గురే భారతదేశ భవిష్యత్తు. బీజేపీ నిరంకుశత్వానికి వ్యతిరేకంగా, ప్రజాస్వామ్యాన్ని కాపాడేందుకు ఇండియా కూటమి బీహార్‌లో చేతులు కలిపింది" అని ఆమె పేర్కొన్నారు. ఆగస్టు 17న ప్రారంభమైన ఈ యాత్ర సెప్టెంబర్ 1న పాట్నాలో ముగియనుంది.