రెండు ప్రేమకథలతో వస్తున్న 'సుందరకాండ'.. రిలీజ్‌కు గ్రీన్ సిగ్నల్

విభిన్నమైన కథలతో ప్రేక్షకులను అలరించే నటుడు నారా రోహిత్. కొంత విరామం తర్వాత నటిస్తున్న తాజా చిత్రం 'సుందరకాండ'. వెంకటేశ్ నిమ్మలపూడి దర్శకత్వంలో తెరకెక్కిన ఈ రొమాంటిక్ డ్రామా తాజాగా సెన్సార్ కార్యక్రమాలను పూర్తి చేసుకుంది. ఎలాంటి కట్స్ లేకుండా సినిమాకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్‌సీ) క్లీన్ 'యు/ఎ' సర్టిఫికెట్ జారీ చేసింది. దీంతో సినిమా విడుదలకు మార్గం సుగమమైంది.

ఈ విషయాన్ని నిర్మాణ సంస్థ సందీప్ పిక్చర్ ప్యాలెస్ సోషల్ మీడియా ద్వారా అధికారికంగా ప్రకటించింది. వినాయక చవితి పండుగ సందర్భంగా రేపు (బుధవారం) ఈ చిత్రాన్ని ప్రపంచవ్యాప్తంగా విడుదల చేయనున్నట్లు తెలిపింది. పండుగ సెలవులతో పాటు లాంగ్ వీకెండ్ కూడా కలిసిరావడం సినిమాకు కలిసొచ్చే అంశం. నారా రోహిత్ కెరీర్‌లో ఇది 20వ సినిమా కావడం విశేషం.

ఇప్పటికే విడుదలైన టీజర్, పోస్టర్లు సినిమాపై ఆసక్తిని పెంచాయి. ఒక మధ్య వయస్కుడైన బ్రహ్మచారి జీవితంలోని రెండు వేర్వేరు దశల్లోని ప్రేమకథలను ఈ సినిమాలో చూపించనున్నట్లు తెలుస్తోంది. పాత తరం నటి శ్రీదేవి విజయ్‌కుమార్‌తో ఒక ప్రేమకథ, యువ నటి వ్రితి వాఘనితో మరో ప్రేమకథలో నారా రోహిత్ కనిపించనున్నారు. ఈ సినిమా తేలికైన హాస్యంతో, ఆహ్లాదకరమైన అనుభూతిని పంచుతుందని చిత్ర వర్గాలు చెబుతున్నాయి.

లియోన్ జేమ్స్ స్వరపరిచిన ఈ చిత్రంలోని ‘బహుశా బహుశా’ పాట ఇప్పటికే చార్ట్‌బస్టర్‌గా నిలిచింది. సిద్ శ్రీరామ్ ఆలపించిన ఈ గీతం సంగీత ప్రియులను విశేషంగా ఆకట్టుకుంది. సంతోష్ చిన్నపొల్ల, గౌతమ్ రెడ్డి, రాకేష్ మహంకాళి సంయుక్తంగా సందీప్ పిక్చర్ ప్యాలెస్ బ్యానర్‌పై ఈ చిత్రాన్ని నిర్మించారు. ఈ చిత్రంలో నరేష్, వాసుకి ఆనంద్, సత్య, అజయ్, అభినవ్ గోమఠం, విశ్వంత్, సునైన, రఘుబాబు తదితరులు కీలక పాత్రలు పోషించారు.