ఓటీటీ ఎంట్రీ ఇస్తున్న విజయ్ దేవరకొండ 'కింగ్డమ్'

రౌడీ హీరో విజయ్ దేవరకొండ నటించిన తాజా యాక్షన్ థ్రిల్లర్ ‘కింగ్డమ్’ డిజిటల్ ప్రేక్షకులను అలరించేందుకు సిద్ధమైంది. ఇటీవలే థియేటర్లలో విడుదలై మంచి స్పందన అందుకున్న ఈ చిత్రం, ప్రముఖ ఓటీటీ ప్లాట్‌ఫామ్ నెట్‌ఫ్లిక్స్‌లో స్ట్రీమింగ్ కానుంది. ఈ విషయాన్ని నెట్‌ఫ్లిక్స్ సంస్థ తన సోషల్ మీడియా ఖాతాల ద్వారా అధికారికంగా ప్రకటించింది.

ఈ నెల ఆగస్టు 27వ తేదీ నుంచి ‘కింగ్డమ్’ తమ ప్లాట్‌ఫామ్‌లో అందుబాటులో ఉంటుందని నెట్‌ఫ్లిక్స్ వెల్లడించింది. జులై 31న థియేటర్లలోకి వచ్చిన ఈ సినిమా, నెల రోజులు పూర్తి కాకముందే ఓటీటీలోకి వస్తుండటం గమనార్హం. థియేటర్లలో ఈ చిత్రాన్ని చూడలేకపోయిన ప్రేక్షకులు, అభిమానులు ఇప్పుడు ఇంట్లోనే చూసే అవకాశం లభించింది.

‘జెర్సీ’ ఫేమ్ గౌతమ్ తిన్ననూరి దర్శకత్వం వహించిన ఈ చిత్రంలో విజయ్ దేవరకొండ ఓ కానిస్టేబుల్ పాత్రలో కనిపించారు. ఆయన అన్నయ్య శివ పాత్రలో ప్రముఖ నటుడు సత్యదేవ్ నటించగా, భాగ్యశ్రీ బోర్సే కథానాయికగా నటించారు.