రఘురామకృష్ణరాజుకు సుప్రీంకోర్టులో భారీ ఊరట

ఉండి టీడీపీ ఎమ్మెల్యే, మాజీ ఎంపీ రఘురామకృష్ణరాజుకు సుప్రీంకోర్టులో భారీ ఊరట లభించింది. ఆయనపై నమోదైన కానిస్టేబుల్ పై దాడి కేసుకు సంబంధించి దాఖలైన ఎఫ్ఐఆర్‌ను సర్వోన్నత న్యాయస్థానం కొట్టివేసింది. ఈ కేసును ముందుకు తీసుకెళ్లడం తనకు ఇష్టం లేదని స్వయంగా సదరు కానిస్టేబుల్ ఫరూక్ బాషా అఫిడవిట్ దాఖలు చేయడంతో ఈ పరిణామం చోటుచేసుకుంది.

ఈ కేసు విచారణ సందర్భంగా, కానిస్టేబుల్ ఫరూక్ బాషా తరపు న్యాయవాది కీలక వాదనలు వినిపించారు. బాషా పనిచేస్తున్న ప్రాంతానికి, హైదరాబాద్‌కు దాదాపు 400 కిలోమీటర్ల దూరం ఉందని, ఈ కారణంగా కేసును కొనసాగించడం కష్టంగా ఉందని కోర్టుకు తెలిపారు. దీనిపై గత విచారణలో స్పందించిన ధర్మాసనం, ఈ విషయాన్ని స్పష్టం చేస్తూ అఫిడవిట్ దాఖలు చేయాలని బాషాను ఆదేశించింది. ఆ ఆదేశాల మేరకు బాషా అఫిడవిట్ సమర్పించడంతో, దానిని పరిగణనలోకి తీసుకున్న సుప్రీంకోర్టు రఘురామపై ఉన్న ఎఫ్ఐఆర్‌ను రద్దు చేస్తూ ఉత్తర్వులు జారీ చేసింది.

2022లో హైదరాబాద్‌లోని రఘురామకృష్ణంరాజు నివాసం వద్ద ఈ వివాదం మొదలైంది. ఆయన ఇంటి వద్ద ఓ వ్యక్తి అనుమానాస్పదంగా తిరుగుతుండటంతో, రఘురామ సిబ్బంది అతడిని పట్టుకుని పోలీసులకు అప్పగించారు. విచారణలో ఆ వ్యక్తి కానిస్టేబుల్ ఫరూక్ బాషా అని తేలింది. అప్పటి వైసీపీ ప్రభుత్వం తనపై నిఘా పెట్టేందుకే ఆయన్ను పంపిందని ఆరోపిస్తూ రఘురామ, ఆయన కుమారుడు భరత్ గచ్చిబౌలి పోలీస్ స్టేషన్‌లో ఫిర్యాదు చేశారు. అయితే, ఆ ఫిర్యాదుపై పోలీసులు చర్యలు తీసుకోలేదు. కానీ, కానిస్టేబుల్ బాషా ఇచ్చిన ఫిర్యాదు ఆధారంగా రఘురామ, ఆయన సిబ్బందిపై కేసు నమోదు చేశారు.

ఈ ఎఫ్ఐఆర్‌ను కొట్టివేయాలని కోరుతూ రఘురామ మొదట హైకోర్టును ఆశ్రయించారు. అయితే అక్కడ ఆయనకు చుక్కెదురు కావడంతో, చివరకు సుప్రీంకోర్టును ఆశ్రయించగా, ఆయనకు అనుకూలంగా తీర్పు వచ్చింది.