పెళ్లైన ఏడాదికే శుభవార్త చెప్పిన స్టార్ కపుల్

బాలీవుడ్ నటి పరిణీతి చోప్రా, ఆమ్ ఆద్మీ పార్టీ (ఆప్) ఎంపీ రాఘవ్ చద్దా దంపతులు త్వరలో తల్లిదండ్రులు కాబోతున్నారు. తమ తొలి బిడ్డ రాక గురించి సోషల్ మీడియా వేదికగా ఈ జంట అధికారికంగా ప్రకటించింది. ఈ శుభవార్తతో వారి అభిమానులు, శ్రేయోభిలాషులు ఆనందంలో మునిగిపోయారు.

ఈ సందర్భంగా పరిణీతి, రాఘవ్ ఇద్దరూ కలిసి ఇన్‌స్టాగ్రామ్‌లో ఒక ఆసక్తికరమైన పోస్ట్ చేశారు. '1+1=3' అనే సందేశంతో ఉన్న ఒక కేక్ ఫొటోను, ఇద్దరూ పార్కులో చేతులు పట్టుకుని నడుస్తున్న వీడియోను వారు పంచుకున్నారు. "మా బుల్లి విశ్వం... రాబోతోంది. మేం అదృష్టవంతులం" అంటూ తమ ఆనందాన్ని క్యాప్షన్‌లో వ్యక్తం చేశారు. ఈ పోస్ట్ క్షణాల్లో వైరల్‌గా మారింది.

ఈ వార్త తెలియగానే సోనమ్ కపూర్, భూమి పెడ్నేకర్, హుమా ఖురేషీ వంటి పలువురు బాలీవుడ్ ప్రముఖులు సోషల్ మీడియా ద్వారా వారికి శుభాకాంక్షలు తెలిపారు. అభిమానులు కూడా కామెంట్ల రూపంలో అభినందనలు తెలియజేస్తున్నారు.

2023లో ప్రేమలో పడిన ఈ జంట, అదే ఏడాది మే నెలలో ఢిల్లీలో నిశ్చితార్థం చేసుకున్నారు. అనంతరం సెప్టెంబర్‌లో రాజస్థాన్‌లోని ఉదయ్‌పూర్‌లో వీరి వివాహం అంగరంగ వైభవంగా జరిగింది.

ఇక పరిణీతి కెరీర్ విషయానికొస్తే, ఆమె త్వరలో ఒక నెట్‌ఫ్లిక్స్ సిరీస్‌తో ప్రేక్షకుల ముందుకు రానున్నారు. తాహిర్ రాజ్ భాసిన్, జెన్నిఫర్ వింగెట్ వంటి ప్రముఖులు నటించిన ఈ సిరీస్ షూటింగ్ ఇప్పటికే పూర్తయింది.