30,000 ఉద్యోగాల తొలగింపు.. స్పందించిన టీసీఎస్

ప్రముఖ ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్)లో ఉద్యోగాల తొలగింపు అంశం తీవ్ర కలకలం రేపుతోంది. కంపెనీ వేలాది మంది ఉద్యోగులను తొలగించేందుకు సిద్ధమైందంటూ ఐటీ ఉద్యోగ సంఘాలు దేశవ్యాప్తంగా ఆందోళనలు చేపట్టాయి. సుమారు 30,000 మంది ఉద్యోగులపై వేటు వేయనున్నారని యూనియన్లు ఆరోపిస్తుండగా, టీసీఎస్ మాత్రం ఈ సంఖ్యను ఖండించింది.

సీఐటీయూ మద్దతుతో యునైటెడ్ ఐటీ అండ్ ఐటీఈఎస్ ఎంప్లాయీస్ (యూనైట్) ఆధ్వర్యంలో పలు నగరాల్లో నిరసనలు జరిగాయి. తొలగింపు నిర్ణయాన్ని టీసీఎస్ వెంటనే వెనక్కి తీసుకోవాలని, ఈ విషయంలో ప్రభుత్వం జోక్యం చేసుకోవాలని వారు డిమాండ్ చేశారు.

"తొలగింపునకు గురవుతున్న వారిలో అత్యధికులు అనుభవజ్ఞులే. మంచి నైపుణ్యాలు, నాయకత్వ లక్షణాలు ఉన్నవారిని కూడా తీసివేయడం ఆందోళన కలిగిస్తోంది" అని యూనైట్ జాయింట్ సెక్రటరీ చంద్రశేఖర్ ఆజాద్ తెలిపారు. ప్రభుత్వం స్పందించకపోతే అంతర్జాతీయ కార్మిక సంఘాలతో కలిసి ఈ పోరాటాన్ని ప్రపంచవ్యాప్తం చేస్తామని హెచ్చరించారు.

అనుభవజ్ఞుల స్థానంలో కొత్తగా చేరిన ఫ్రెషర్లను 80-85 శాతం తక్కువ జీతానికి నియమించుకుంటోందని యూనైట్ ఆరోపిస్తోంది. ఉద్యోగులను తొలగించే బదులు వారి నైపుణ్యాలను పెంచాలని హితవు పలికింది. రూ. 2.55 లక్షల కోట్ల ఆదాయం కలిగిన కంపెనీ లాభార్జన కోసం ఉద్యోగులను తొలగించడం అన్యాయమని పేర్కొంది.

ఉద్యోగ సంఘాల ఆరోపణలను టీసీఎస్ తీవ్రంగా ఖండించింది. ఈ వార్తలు "తప్పుదోవ పట్టించేవి, అవాస్తవం" అని ఒక ప్రకటనలో పేర్కొంది. ప్రపంచవ్యాప్తంగా ఉన్న తమ ఉద్యోగులలో కేవలం 2 శాతం మందిపై, అంటే సుమారు 12,000 మందిపై మాత్రమే ఈ ప్రభావం ఉంటుందని స్పష్టం చేసింది. క్లౌడ్, ఏఐ వంటి భవిష్యత్ సాంకేతికతలకు అనుగుణంగా సంస్థను పునర్నిర్మించేందుకే ఈ చర్యలు చేపట్టినట్లు వివరించింది. ప్రభావిత ఉద్యోగులకు పరిహారంతో పాటు అన్ని విధాలా సహాయ సహకారాలు అందిస్తామని హామీ ఇచ్చింది.

ఈ వివాదంపై కర్ణాటక స్టేట్ ఐటీ/ఐటీఈఎస్ ఎంప్లాయీస్ యూనియన్ (కిటు) ఫిర్యాదుతో కర్ణాటక కార్మిక శాఖ రంగంలోకి దిగింది. ఇటీవల కార్మిక శాఖ అధికారులతో జరిగిన సమావేశంలో టీసీఎస్ ప్రతినిధులు పాల్గొన్నారు. ఉద్యోగాల తొలగింపు ప్రక్రియ ఇంకా ప్రారంభం కాలేదని, ఏ నగరంలో ఎంతమందిని తొలగిస్తారనే దానిపై తుది నిర్ణయం తీసుకోలేదని వారు అధికారులకు వివరించారు. చట్ట ప్రకారం ఉద్యోగుల హక్కులను గౌరవించాలని, వారికి సరైన పరిహారం అందించాలని కార్మిక శాఖ అధికారులు కంపెనీకి సూచించారు.