ఐసీసీ అండర్-19 వరల్డ్ కప్... చివరి బెర్తు దక్కించుకున్న అమెరికా

2026లో జరగనున్న ఐసీసీ అండర్ 19 పురుషుల క్రికెట్ ప్రపంచకప్‌కు రంగం సిద్ధమైంది. జింబాబ్వే, నమీబియా సంయుక్తంగా ఆతిథ్యం ఇవ్వనున్న ఈ మెగా టోర్నీలో పోటీపడే 16 జట్ల జాబితా ఖరారైంది. అమెరికాస్ క్వాలిఫయర్‌లో అద్భుత ప్రదర్శన చేసిన యూఎస్ఏ, చివరి జట్టుగా అర్హత సాధించి వరల్డ్ కప్ బెర్తును దక్కించుకుంది.

గత 2024 ఎడిషన్‌లో టాప్-10లో నిలిచిన జట్లు నేరుగా ఈ టోర్నీకి అర్హత సాధించాయి. వీటిలో భారత్, ఆస్ట్రేలియా, పాకిస్థాన్, ఇంగ్లండ్ వంటి బలమైన జట్లు ఉన్నాయి. ఆతిథ్య దేశంగా జింబాబ్వేకు నేరుగా ప్రవేశం లభించింది. మిగిలిన ఐదు స్థానాల కోసం ఆఫ్రికా, అమెరికాస్, ఆసియా, ఈస్ట్ ఆసియా-పసిఫిక్, యూరప్ రీజియన్లలో క్వాలిఫయింగ్ టోర్నీలు నిర్వహించారు.

టోర్నీలో పాల్గొనే జట్లు ఇవే...
ప్రధాన ఆతిథ్య దేశం: జింబాబ్వే
నేరుగా అర్హత పొందినవి: భారత్, ఆస్ట్రేలియా, బంగ్లాదేశ్, ఇంగ్లండ్, ఐర్లాండ్, పాకిస్థాన్, న్యూజిలాండ్, శ్రీలంక, దక్షిణాఫ్రికా, వెస్టిండీస్.
క్వాలిఫయర్ల ద్వారా వచ్చినవి: టాంజానియా (ఆఫ్రికా), అమెరికా (అమెరికాస్), ఆఫ్ఘనిస్థాన్ (ఆసియా), జపాన్ (ఈస్ట్ ఆసియా-పసిఫిక్), స్కాట్లాండ్ (యూరప్).

ఈసారి టోర్నీలో కొన్ని కొత్త జట్లు తమ సత్తా చాటేందుకు సిద్ధమవుతున్నాయి. ఆఫ్రికా క్వాలిఫయర్‌లో టాంజానియా, ఈస్ట్ ఆసియా-పసిఫిక్ నుంచి జపాన్ జట్లు అర్హత సాధించి అందరి దృష్టిని ఆకర్షించాయి. ఈ జట్ల చేరికతో పాటు, బలమైన జట్ల మధ్య పోరుతో ఈ టోర్నమెంట్‌పై ఆసక్తి నెలకొంది. క్రికెట్ ప్రపంచంలో భవిష్యత్ తారలను పరిచయం చేసే ఈ వేదిక, మరోసారి ఉత్కంఠభరితమైన పోరుకు సిద్ధమవుతోంది.