వరుసగా సెలవులు... తిరుమలకు పోటెత్తిన భక్తులు

వరుసగా వచ్చిన సెలవుల కారణంగా తిరుమల గిరులు భక్తులతో కిక్కిరిసిపోయాయి. శ్రీ వేంకటేశ్వర స్వామి దర్శనం కోసం భక్తులు భారీ సంఖ్యలో తరలిరావడంతో కొండపై అనూహ్యమైన రద్దీ నెలకొంది. టోకెన్లు లేకుండా సర్వదర్శనం కోసం వెళ్లే భక్తులకు దాదాపు 24 గంటల సమయం పడుతుండటం ప్రస్తుత రద్దీ తీవ్రతకు అద్దం పడుతోంది.

శుక్రవారం (ఆగస్టు 15), శనివారం కృష్ణాష్టమి, ఆదివారం సెలవు దినం కావడంతో తెలుగు రాష్ట్రాలతో పాటు ఇతర ప్రాంతాల నుంచి కూడా భక్తులు పెద్ద ఎత్తున తిరుమలకు చేరుకున్నారు. ఈ అనూహ్య రద్దీతో వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు, నారాయణగిరి షెడ్లు పూర్తిగా నిండిపోయాయి. దీంతో భక్తుల క్యూలైన్లు వెలుపలికి విస్తరించాయి. రద్దీని క్రమబద్ధీకరించేందుకు అధికారులు ఆక్టోపస్ భవనం వద్ద నుంచే భక్తులను క్యూలైన్లలోకి అనుమతిస్తున్నారు.

గంటల తరబడి క్యూలైన్లలో వేచి ఉంటున్న భక్తుల ఇబ్బందులను దృష్టిలో ఉంచుకుని, తిరుమల తిరుపతి దేవస్థానం (టీటీడీ) సిబ్బంది నిరంతరాయంగా అన్నప్రసాదాలు, తాగునీరు, పాలు అందిస్తోంది. భక్తులకు ఎలాంటి అసౌకర్యం కలగకుండా ఉండేందుకు టీటీడీ అధికారులు ప్రత్యేక ఏర్పాట్లు చేస్తూ పరిస్థితిని నిరంతరం పర్యవేక్షిస్తున్నారు.