Stu Grayson: 21 గంటల 49 నిమిషాలు... ప్రపంచంలోనే అత్యుంత సుదీర్ఘంగా సాగిన రెజ్లింగ్ మ్యాచ్

ఒకటి కాదు రెండు కాదు.. 21 గంటల 49 నిమిషాల పాటు ఏకధాటిగా సాగిన ఓ రెజ్లింగ్ మ్యాచ్ అత్యంత సుదీర్ఘమైన కుస్తీ పోరుగా ప్రపంచ రికార్డు సృష్టించింది. కెనడాలో క్యాన్సర్ బాధితుల సహాయార్థం నిర్వహించిన ఈ ఈవెంట్, ఓ గొప్ప ఆశయం కోసం అలుపెరగని పోరాటానికి నిదర్శనంగా నిలిచింది. అయితే, ఇంతటి ఘనత సాధించినా ఈ రికార్డుకు అధికారిక గుర్తింపు లభించకపోవడం గమనార్హం.

క్యాన్సర్ రోగులకు అండగా నిలిచేందుకు కెనడాలో కొందరు రెజ్లర్లు ఓ వినూత్న కార్యక్రమానికి శ్రీకారం చుట్టారు. ప్రపంచంలోనే అత్యంత సుదీర్ఘమైన రెజ్లింగ్ మ్యాచ్ నిర్వహించి నిధులు సేకరించాలని నిర్ణయించారు. ఈ క్రమంలో వారు ఏకధాటిగా 21 గంటల 49 నిమిషాల 12 సెకన్ల పాటు రెజ్లింగ్ మ్యాచ్ నిర్వహించారు. తద్వారా, 2021లో జపాన్‌లో నమోదైన 21 గంటల 44 నిమిషాల 34 సెకన్ల రికార్డును అధిగమించారు. ఈ హోరాహోరీ పోరులో మాజీ ఏఈడబ్ల్యూ (AEW) స్టార్ స్టూ గ్రేసన్ విజేతగా నిలిచాడు. ఫైనల్‌లో జూనియర్ బెనిటోను తనదైన శైలిలో నైట్‌ఫాల్ మూవ్‌తో పిన్ చేసి గెలుపొందాడు.

ఈ కార్యక్రమం ద్వారా నిర్వాహకులు కెనడియన్ క్యాన్సర్ సొసైటీ కోసం సుమారు 36,900 డాలర్లు (భారత కరెన్సీలో దాదాపు 32 లక్షల రూపాయలు) విరాళంగా సేకరించారు. అయితే, ఈ ప్రపంచ రికార్డుకు గిన్నిస్ గుర్తింపు లభించలేదు. తమ రికార్డును ధృవీకరించాలని గిన్నిస్ వరల్డ్ రికార్డ్స్ సంస్థను సంప్రదించగా, వారు 16,000 డాలర్ల ఫీజు చెల్లించాలని కోరారు. సేవా కార్యక్రమం కోసం సేకరించిన డబ్బును ఫీజు రూపంలో చెల్లించడం సరికాదని భావించిన నిర్వాహకులు ఆ ప్రతిపాదనను తిరస్కరించారు.

"గిన్నిస్ సంస్థ అడిగినంత పెద్ద మొత్తాన్ని మేము ఫీజుగా చెల్లించలేం. అందుకే ఇది అనధికారిక ప్రపంచ రికార్డుగానే మిగిలిపోతుంది" అని ఈవిల్ ఉనో అనే రెజ్లర్ ఈ విషయంపై స్పష్టత ఇచ్చారు. ఈ చారిత్రక ఈవెంట్‌లో స్టూ గ్రేసన్‌తో పాటు డాంటే డుబాయిస్, గాబ్రియెల్ ఫ్లాయిడ్, కత్రినా క్రీడ్, సెసిల్ నిక్స్ వంటి అనేక మంది రెజ్లర్లు పాల్గొని తమ సహకారాన్ని అందించారు.