బెయిల్ రద్దు చేసిన సుప్రీంకోర్టు... దర్శన్, పవిత్ర గౌడ మళ్లీ అరెస్ట్

అభిమాని రేణుకాస్వామి హత్య కేసులో కన్నడ నటుడు దర్శన్, ఆయన స్నేహితురాలు పవిత్ర గౌడలకు సుప్రీంకోర్టులో గట్టి ఎదురుదెబ్బ తగిలింది. ఈ కేసులో వారికి గతంలో మంజూరైన బెయిల్‌ను సర్వోన్నత న్యాయస్థానం రద్దు చేయడంతో, బెంగళూరు పోలీసులు వీరిద్దరినీ అదుపులోకి తీసుకున్నారు. ఈ పరిణామం కన్నడ చిత్ర పరిశ్రమలో మరోసారి కలకలం రేపింది.

సుప్రీంకోర్టు తీర్పు వెలువడిన కొన్ని గంటల వ్యవధిలోనే పోలీసులు రంగంలోకి దిగారు. మొదట పవిత్రా గౌడను ఆమె నివాసంలో అరెస్ట్ చేయగా, అనంతరం హొసకెరెహళ్లిలోని భార్య ఇంట్లో ఉన్న దర్శన్‌ను అదుపులోకి తీసుకున్నారు. మీడియా కంటపడకుండా ఉండేందుకు దర్శన్ వెనుక గేటు నుంచి ఇంట్లోకి వెళ్లినట్లు తెలిసింది.

గతేడాది డిసెంబరులో కర్ణాటక హైకోర్టు దర్శన్, పవిత్రలకు బెయిల్ మంజూరు చేయగా, దీనిని రాష్ట్ర పోలీసులు సుప్రీంకోర్టులో సవాలు చేశారు. ఈ పిటిషన్‌ను విచారించిన సర్వోన్నత న్యాయస్థానం, బెయిల్‌ను రద్దు చేస్తూ, కేసు విచారణను వేగవంతం చేయాలని అధికారులకు స్పష్టమైన ఆదేశాలు జారీ చేసింది.

చిత్రదుర్గకు చెందిన రేణుకాస్వామి అనే యువకుడు, పవిత్రా గౌడకు సోషల్ మీడియాలో అసభ్యకరమైన సందేశాలు పంపాడనే ఆరోపణలతో ఈ దారుణ హత్య జరిగింది. అతడిని కిడ్నాప్ చేసి, చిత్రహింసలకు గురిచేసి హత్య చేసినట్లు పోలీసుల దర్యాప్తులో తేలింది. బాధితుడికి కరెంట్ షాక్ ఇచ్చినట్లు కూడా పోస్టుమార్టం నివేదికలో వెల్లడవడంతో ఈ కేసు తీవ్రత బయటపడింది. ఈ కేసులో దర్శన్, పవిత్రలతో కలిపి మొత్తం 15 మంది నిందితులుగా ఉన్నారు.