ఐసీసీ ర్యాంకింగ్స్ లో దూసుకెళ్లిన సిరాజ్, ప్రసిద్ధ్ కృష్ణ

టీమిండియా స్టార్ పేసర్, హైదరాబాదీ ఆటగాడు మహ్మద్ సిరాజ్ ఐసీసీ టెస్ట్ ర్యాంకింగ్స్‌లో సత్తా చాటాడు. ఇంగ్లండ్‌తో ఓవల్ మైదానంలో జరిగిన చివరి టెస్టులో అద్భుత ప్రదర్శన కనబరచడంతో తన కెరీర్‌లోనే అత్యుత్తమ ర్యాంకును సొంతం చేసుకున్నాడు. ఈ మ్యాచ్‌లో ‘ప్లేయర్ ఆఫ్ ది మ్యాచ్’గా నిలిచిన సిరాజ్, తాజాగా ప్రకటించిన బౌలింగ్ ర్యాంకింగ్స్‌లో ఏకంగా 12 స్థానాలు ఎగబాకి 15వ స్థానంలో నిలిచాడు.

ఇంగ్లండ్‌పై ఆరు పరుగుల తేడాతో భారత్ విజయం సాధించిన థ్రిల్లింగ్ మ్యాచ్‌లో సిరాజ్ మొత్తం 9 వికెట్లు పడగొట్టి కీలక పాత్ర పోషించాడు. ఇదే మ్యాచ్‌లో రాణించిన మరో ఫాస్ట్ బౌలర్ ప్రసిద్ధ్ కృష్ణ కూడా తన కెరీర్‌లో అత్యుత్తమంగా 59వ ర్యాంకుకు చేరుకున్నాడు. రెండో ఇన్నింగ్స్‌లో ప్రసిద్ధ్ నాలుగు వికెట్లు తీసి జట్టు విజయంలో పాలుపంచుకున్నాడు. ఈ ప్రదర్శనతో సిరాజ్, ప్రసిద్ధ్ కృష్ణ ఓ అరుదైన ఘనతను కూడా అందుకున్నారు. ఒకే టెస్టులోని రెండు ఇన్నింగ్స్‌లలోనూ తలా నాలుగు వికెట్లు తీసిన రెండో భారత బౌలర్ల జంటగా వీరు రికార్డు సృష్టించారు. గతంలో 1969లో బిషన్ సింగ్ బేడీ, ఎరాపల్లి ప్రసన్న ఈ ఘనత సాధించారు.

ఇక బ్యాటింగ్ ర్యాంకింగ్స్ విషయానికొస్తే, భారత యువ ఓపెనర్ యశస్వి జైస్వాల్ తిరిగి టాప్-5లోకి ప్రవేశించాడు. ఓవల్ టెస్టు రెండో ఇన్నింగ్స్‌లో శతకం (118) చేయడంతో అతను ఐదో స్థానాన్ని దక్కించుకున్నాడు. ఇంగ్లండ్ బ్యాటర్ జో రూట్ అగ్రస్థానంలో కొనసాగుతుండగా, అదే మ్యాచ్‌లో సెంచరీతో మెరిసిన హ్యారీ బ్రూక్ రెండో స్థానానికి చేరుకున్నాడు.

ఇతర దేశాల ఆటగాళ్లలో, జింబాబ్వేపై 9 వికెట్లు తీసిన న్యూజిలాండ్ పేసర్ మ్యాట్ హెన్రీ కెరీర్ బెస్ట్ నాలుగో ర్యాంకును అందుకున్నాడు. అతని సహచర ఆటగాడు డారిల్ మిచెల్ బ్యాటర్ల జాబితాలో టాప్-10లోకి వచ్చాడు. పాకిస్థాన్, వెస్టిండీస్ టీ20 సిరీస్ తర్వాత కొందరు పాక్ ఆటగాళ్లు కూడా టీ20 ర్యాంకింగ్స్‌లో తమ స్థానాలను మెరుగుపరుచుకున్నారు.