ట్రోఫీకి పేరు వాళ్లది, కానీ వేడుకలో వాళ్లే లేరు.. సచిన్, అండర్సన్ గైర్హాజరుపై దుమారం

భారత్, ఇంగ్లండ్ మధ్య టెస్ట్ క్రికెట్ పోరుకు కొత్త శోభ తీసుకొచ్చిన అండర్సన్-టెండూల్కర్ ట్రోఫీ.. తొలి అడుగులోనే పెద్ద వివాదంలో చిక్కుకుంది. ఏ ఇద్దరు క్రికెట్ దిగ్గజాల గౌరవార్థమైతే ఈ ట్రోఫీని ఏర్పాటు చేశారో, వారే ఈ ట్రోఫీ ప్రదానోత్సవానికి హాజరుకాకపోవడం తీవ్ర చర్చనీయాంశంగా మారింది. ఈ ఘటనపై అభిమానులు, విశ్లేషకుల నుంచి తీవ్ర స్థాయిలో విమర్శలు వెల్లువెత్తుతున్నాయి.

ఇంగ్లండ్ వేదికగా జరిగిన 2025 టెస్ట్ సిరీస్ ముగింపు సందర్భంగా విజేత జట్టుకు ట్రోఫీని అందించే కార్యక్రమం జరిగింది. అయితే, ఈ వేడుకలో సచిన్ టెండూల్కర్ గానీ, జేమ్స్ అండర్సన్ గానీ కనిపించలేదు. తమ పేర్లతో ఏర్పాటైన ట్రోఫీని అందించేందుకు కూడా వారు రాకపోవడంతో అందరూ ఆశ్చర్యపోయారు. గతంలో ఇరు జట్ల మధ్య జరిగే టెస్ట్ సిరీస్‌లకు పటౌడీ, ఆంటోనీ డి మెల్లో ట్రోఫీలను అందించేవారు. వాటి స్థానంలో ఈ కొత్త ట్రోఫీని శాశ్వతంగా ఏర్పాటు చేశారు.

విశేషమేమిటంటే, సిరీస్ ప్రారంభానికి ముందు లండన్‌లో జరిగిన ట్రోఫీ ఆవిష్కరణ కార్యక్రమానికి సచిన్, అండర్సన్ ఇద్దరూ హాజరయ్యారు. తమకు దక్కిన ఈ అరుదైన గౌరవంపై ఎంతో గర్వంగా ఉందని, ఆనందం వ్యక్తం చేశారు. 700కు పైగా టెస్ట్ వికెట్లు పడగొట్టిన 42 ఏళ్ల అండర్సన్, "సచిన్ వంటి గొప్ప ఆటగాడి పేరుతో పాటు నా పేరును ట్రోఫీకి పెట్టడం నాకు కొంచెం అసౌకర్యంగా ఉంది" అని ఎంతో వినమ్రంగా వ్యాఖ్యానించాడు.

అయితే, ఎంతో ముఖ్యమైన ట్రోఫీ ప్రదానోత్సవానికి ఈ దిగ్గజాలు ఎందుకు రాలేదనే దానిపై ఇంగ్లండ్ క్రికెట్ బోర్డు (ఈసీబీ) గానీ, బీసీసీఐ గానీ ఇప్పటివరకు ఎలాంటి అధికారిక ప్రకటన చేయలేదు. వారి మౌనంతో వివాదం మరింత ముదిరింది. ఇది నిర్వాహకుల వైఫల్యమేనని, దిగ్గజాలను అవమానించడమేనని సోషల్ మీడియాలో అభిమానులు కామెంట్ల వర్షం కురిపిస్తున్నారు. షెడ్యూల్ సమస్యలా? వ్యక్తిగత కారణాలా? లేక నిర్వాహక లోపమా? అనేది తెలియాల్సి ఉంది.