Nitish Kumar: ప్రారంభించిన రెండు నెలల్లోనే కుంగిన డబుల్ డెక్కర్ ఫ్లైఓవర్!

బీహార్ రాజధాని పాట్నాలో ఇటీవల నిర్మించిన డబుల్ డెక్కర్ ఫ్లైఓవర్‌లో ఒక భాగం భారీ వర్షాల కారణంగా కుంగిపోయింది. రూ.422 కోట్ల వ్యయంతో నిర్మించిన ఈ ఫ్లైఓవర్‌ను ముఖ్యమంత్రి నితీశ్ కుమార్ రెండు నెలల క్రితం ప్రారంభించారు.  
 
పాట్నాలోని రద్దీగా ఉండే అశోక్ రాజ్‌పథ్‌లో ట్రాఫిక్‌ను తగ్గించడానికి ఈ ఫ్లైఓవర్‌ను నిర్మించారు. 2.2 కిలోమీటర్ల పొడవైన ఈ ప్రాజెక్టును జూన్ 11న ముఖ్యమంత్రి నితీశ్ కుమార్ స్వయంగా ప్రారంభించారు. ఆదివారం కురిసిన భారీ వర్షాలకు ఫ్లైఓవర్ మధ్యలో ఒక పెద్ద గుంత ఏర్పడింది. ఇందుకు సంబంధించిన వీడియో సోషల్ మీడియాలో వైరల్ అవుతోంది.

ఈ ఫ్లైఓవర్‌ను బీహార్ స్టేట్ బ్రిడ్జ్ కన్‌స్ట్రక్షన్ కార్పొరేషన్ లిమిటెడ్ నిర్మించింది. అశోక్ రాజ్‌పథ్ ప్రాంతంలో రెండు ఫ్లైఓవర్ టయర్లు, గ్రౌండ్-లెవల్ సర్వీస్ రోడ్, భూగర్భ మెట్రో వ్యవస్థతో పాటు నాలుగు స్థాయుల నిర్మాణం జరగనుంది. ఫ్లైఓవర్ కుంగిపోవడంపై ప్రజల నుంచి విమర్శలు వ్యక్తమవుతున్నాయి. ఇంత భారీ బడ్జెట్‌తో నిర్మించిన ప్రాజెక్టు నాణ్యతపై ప్రశ్నలు తలెత్తుతున్నాయి. 

పాట్నాకు ఆరెంజ్ అలర్ట్
గత 24 గంటలుగా పాట్నాలో ఎడతెరిపి లేకుండా వర్షాలు కురుస్తున్నాయి. దీనివల్ల నగరంలోని కంకర్‌బాగ్, రాజేంద్ర నగర్, ఎగ్జిబిషన్ రోడ్ వంటి అనేక ప్రాంతాలు జలమయం అయ్యాయి. వాతావరణ శాఖ పాట్నాతో పాటు మరో 13 జిల్లాలకు రాబోయే 48 గంటలకు 'ఆరెంజ్ అలర్ట్' జారీ చేసింది. పలు జిల్లాల్లో తేలికపాటి నుంచి మోస్తరు వర్షాలు నమోదైనట్టు తెలిపింది.