వైద్య రంగంలో మరో అద్భుతం.. 30 ఏళ్ల నాటి పిండం నుంచి శిశువు జననం!

వైద్య రంగంలో మరో అద్భుతం ఆవిష్కృతమైంది. సరిగ్గా 30 ఏళ్ల క్రితం ప్రయోగశాలలో సృష్టించి, ఘనీభవించిన స్థితిలో భద్రపరిచిన పిండం నుంచి ఓ శిశువు ఆరోగ్యంగా జన్మించింది. అమెరికాలోని ఓహియోలో చోటుచేసుకున్న ఈ ఘటన పునరుత్పత్తి వైద్య చరిత్రలో సరికొత్త ప్రపంచ రికార్డును నెలకొల్పింది. ఎన్నో ఏళ్లుగా సంతానం కోసం ఎదురుచూస్తున్న ఓ జంట పాలిట ఈ సాంకేతికత వరంలా మారింది.

లిండ్సే, టిమ్ పియర్స్ అనే దంపతులు చాలాకాలంగా పిల్లల కోసం ప్రయత్నిస్తున్నారు. ‘స్నోఫ్లేక్స్’ అనే ఓ పిండ దత్తత కార్యక్రమం ద్వారా చివరికి వారి కల నెరవేరింది. 1994లో లిండా ఆర్చర్డ్ అనే మహిళ ఐవీఎఫ్ (ఇన్ విట్రో ఫెర్టిలైజేషన్) విధానం ద్వారా గర్భం దాల్చారు. ఆ ప్రక్రియలో ఆమె ఒక కుమార్తెకు జన్మనిచ్చారు. అయితే, అదనంగా మిగిలిపోయిన మూడు పిండాలను భవిష్యత్ అవసరాల కోసం శీతలీకరించి (ఫ్రీజ్ చేసి) భద్రపరిచారు.

దాదాపు మూడు దశాబ్దాల తర్వాత లిండా మెనోపాజ్ దశకు చేరుకున్నారు. ఆ పిండాలను వృథా చేయడం ఇష్టం లేక, వాటికి జీవం పోయాలని నిర్ణయించుకున్నారు. ఈ క్రమంలో, ‘నైట్‌లైట్ క్రిస్టియన్ అడాప్షన్స్’ అనే సంస్థ నడిపే ‘స్నోఫ్లేక్స్’ కార్యక్రమంలో భాగంగా తన పిండాలను దానం చేశారు. ఈ కార్యక్రమం ద్వారానే లిండ్సే, టిమ్ పియర్స్ దంపతులు లిండాను సంప్రదించారు.

లిండా దానం చేసిన మూడు పిండాలలో రెండింటిని వైద్య నిపుణులు విజయవంతంగా సాధారణ స్థితికి తీసుకువచ్చారు. వాటిలో ఒక పిండాన్ని లిండ్సే గర్భంలో ప్రవేశపెట్టగా, అది విజయవంతంగా పెరిగి థియో అనే ఆరోగ్యవంతమైన బాబు జన్మించాడు. టెన్నస్సీలోని ఐవీఎఫ్ క్లినిక్‌లో నిపుణుల బృందం ఈ సంక్లిష్టమైన ప్రక్రియను పర్యవేక్షించింది. 1990ల నాటి సాంకేతికతతో పిండాలను భద్రపరిచినప్పటికీ, ప్రక్రియ మొత్తం సజావుగా సాగిందని వైద్యులు తెలిపారు.

ఈ జననంతో ఓ ఆసక్తికరమైన బంధం ఏర్పడింది. థియోకు జీవశాస్త్రపరంగా (బయోలాజికల్‌గా) 30 ఏళ్ల వయసున్న ఒక సోదరి ఉంది. ఆమె 1994లో ఇదే ఐవీఎఫ్ బ్యాచ్ పిండం నుంచి జన్మించింది. ఒకేసారి సృష్టించిన పిండాల నుంచి 30 ఏళ్ల వ్యత్యాసంతో అన్నాచెల్లెళ్లు జన్మించడం వైద్య చరిత్రలోనే ఓ అరుదైన మైలురాయిగా నిలిచిపోయింది. ఇప్పుడీ శిశువును ప్రపంచంలోనే ‘అత్యంత పురాతన శిశువు’గా చెబుతున్నారు.