అమెరికాలో కూలిన యుద్ధ విమానం.. ఎఫ్ 35 జెట్ క్రాష్.. వీడియో ఇదిగో!

అమెరికాలోని కాలిఫోర్నియాలో యుద్ధ విమానం కూలిపోయింది. పైలట్ శిక్షణ తీసుకుంటుండగా దురదృష్టవశాత్తూ ఎఫ్ 35 యుద్ధ విమానం కూలిపోయిందని అమెరికా నేవీ ప్రకటించింది. అమెరికా కాలమానం ప్రకారం.. ఈ రోజు ఉదయం 6:30 గంటల ప్రాంతంలో కాలిఫోర్నియాలోని ఫ్రెన్సో సిటీకి 64 కిలోమీటర్ల దూరంలో విమానం కూలిపోయిందని తెలిపింది. విమానం కూలడానికి ముందే పైలట్ బయటపడ్డాడని, పారాచూట్ సాయంతో నేలపై దిగాడని పేర్కొంది. ఈ ఘటనలో గాయాలపాలైన పైలట్ ను విమానంలో ఆసుపత్రికి తరలించినట్లు అధికారులు తెలిపారు. ఈ ప్రమాదానికి సంబంధించిన వీడియో ప్రస్తుతం సోషల్ మీడియాలో వైరల్ గా మారింది. ఘటనాస్థలంలో ఎగిసిపడుతున్న మంటలను అదుపు చేసేందుకు అగ్నిమాపక సిబ్బంది ప్రయత్నిస్తున్నారు.