గిల్ ఆట నాకు స్ఫూర్తి... ఈసారి డబుల్ సెంచరీ కొడతా: వైభవ్ సూర్యవంశీ

భారత యువ క్రికెట్‌లో ఓ కొత్త సంచలనం వెలుగులోకి వచ్చింది. కేవలం 14 ఏళ్ల వయసులోనే వైభవ్ సూర్యవంశీ అద్భుతమైన రికార్డుతో చరిత్ర సృష్టించడం తెలిసిందే. ఇంగ్లండ్ అండర్-19 జట్టుతో వోర్సెస్టర్‌లో శనివారం జరిగిన నాలుగో వన్డేలో వైభవ్ ఆకాశమే హద్దుగా చెలరేగాడు. కేవలం 52 బంతుల్లోనే సెంచరీ పూర్తి చేసి, యూత్ వన్డే క్రికెట్ చరిత్రలోనే అత్యంత వేగవంతమైన శతకాన్ని నమోదు చేసిన ఆటగాడిగా నిలిచాడు. ఈ మ్యాచ్‌లో మొత్తం 78 బంతులు ఎదుర్కొన్న వైభవ్, 143 పరుగుల విధ్వంసకర ఇన్నింగ్స్‌తో భారత జట్టుకు 55 పరుగుల తేడాతో విజయాన్ని, తద్వారా సిరీస్‌ను అందించాడు.

ఈ అద్భుత ఇన్నింగ్స్ అనంతరం బీసీసీఐతో మాట్లాడిన వైభవ్ పలు ఆసక్తికర విషయాలు పంచుకున్నాడు. "నేను రికార్డు సృష్టించానన్న విషయం నాకు తెలియదు. సెంచరీ పూర్తయ్యాక మా టీమ్ మేనేజర్ చెప్పే వరకు నాకు ఆ విషయం తెలీలేదు" అని అన్నాడు. ఈ రికార్డుతో తన ఆకలి తీరలేదని, సోమవారం జరగనున్న చివరి వన్డేలో డబుల్ సెంచరీ సాధించడమే తన లక్ష్యమని ధీమా వ్యక్తం చేశాడు. "తర్వాతి మ్యాచ్‌లో 200 పరుగులు చేయడానికి ప్రయత్నిస్తా. వీలైనంత వరకు 50 ఓవర్లు ఆడితే జట్టుకు అంత మేలు జరుగుతుంది" అని తెలిపాడు.

టీమిండియా స్టార్ బ్యాటర్ శుభ్‌మన్ గిల్ ఇన్నింగ్స్‌ను ప్రత్యక్షంగా చూడటమే తనలో ఇంతటి స్ఫూర్తిని నింపిందని వైభవ్ వెల్లడించాడు. "ఎడ్జ్‌బాస్టన్‌లో శుభ్‌మన్ గిల్ ఆటను ప్రత్యక్షంగా చూశాక నాలో ఎంతో ప్రేరణ కలిగింది. అతను 100, 200 పరుగులు చేశాక కూడా ఏమాత్రం అలసట లేకుండా జట్టును ముందుకు నడిపించాడు. నేను కూడా నా ఇన్నింగ్స్‌ను మరింత ముందుకు తీసుకెళ్లాల్సింది. ఔటయ్యే సమయానికి ఇంకా 20 ఓవర్లు మిగిలి ఉన్నాయి. ఒక షాట్ ఆడే క్రమంలో పూర్తిస్థాయిలో దృష్టి పెట్టలేకపోవడం వల్లే ఔటయ్యాను. లేదంటే గిల్ లాగే సుదీర్ఘ ఇన్నింగ్స్ ఆడేవాడిని" అని వైభవ్ వివరించాడు.