బెట్టింగ్ వ్యసనం: డబ్బు కోసం కన్నతండ్రినే కడతేర్చిన కొడుకు!

ఆన్‌లైన్ బెట్టింగ్ వ్యసనం ఒక కుటుంబంలో తీవ్ర విషాదాన్ని నింపింది. డబ్బు కోసం కన్న కొడుకే తండ్రి పాలిట కాలయముడయ్యాడు. ఈ దారుణ ఘటన హైదరాబాద్‌లోని గచ్చిబౌలి పోలీస్ స్టేషన్ పరిధిలో ఆలస్యంగా వెలుగుచూసింది. పోలీసులు వెల్లడించిన వివరాల ప్రకారం ఈ హత్య మంగళవారం జరిగింది.

వనపర్తికి చెందిన హనుమంత్ నాయక్ (38) ఇటీవల తన స్థలాన్ని విక్రయించగా వచ్చిన రూ.6 లక్షలను ఇంటికి తెచ్చారు. ఆయన కుమారుడు రవీందర్ నాయక్ ఆన్‌లైన్ బెట్టింగ్‌కు బానిసయ్యాడు. తండ్రికి తెలియకుండా ఇంట్లో ఉన్న డబ్బు నుంచి రూ.2.5 లక్షలు తీసుకుని బెట్టింగ్‌లో పోగొట్టుకున్నాడు.

కొన్ని రోజులుగా హనుమంత్ నాయక్ డబ్బు గురించి కొడుకును నిలదీయగా, తన స్నేహితుడికి అప్పుగా ఇచ్చానని చెబుతూ రవీందర్ కాలయాపన చేశాడు. ఈ క్రమంలో మంగళవారం మధ్యాహ్నం 12 గంటల సమయంలో ఆ స్నేహితుడు డబ్బు తిరిగి ఇస్తున్నాడని తండ్రిని నమ్మించాడు. మాటలతో మభ్యపెట్టి ఆయనను ఒక నిర్మానుష్య ప్రదేశానికి తీసుకెళ్లాడు. అక్కడ తన వెంట తెచ్చుకున్న కత్తితో తండ్రి గొంతులో పొడిచి అత్యంత కిరాతకంగా హత్య చేశాడు.

అనంతరం రవీందర్ తన బావ రమేష్ నాయక్‌కు ఫోన్ చేసి, తన తండ్రి చనిపోయినట్లు సమాచారం ఇచ్చాడు. ఘటనా స్థలానికి చేరుకున్న కుటుంబ సభ్యులకు రవీందర్ ప్రవర్తనపై అనుమానం కలిగింది. దీంతో రమేష్ నాయక్ గచ్చిబౌలి పోలీసులకు ఫిర్యాదు చేశారు. కేసు నమోదు చేసుకున్న పోలీసులు వెంటనే రంగంలోకి దిగి నిందితుడు రవీందర్ నాయక్‌ను అదుపులోకి తీసుకున్నారు. మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించి, దర్యాప్తు కొనసాగిస్తున్నారు.