తొలి టెస్టులో భారత్ ఓటమి... ఇంగ్లాండ్ విక్టరీ

ఇంగ్లాండ్ పర్యటనలో ఉన్న భారత క్రికెట్ జట్టుకు తొలి టెస్టులోనే నిరాశ ఎదురైంది. లీడ్స్‌లోని హెడింగ్లీ మైదానంలో జరిగిన ఉత్కంఠభరితమైన మొదటి టెస్ట్ మ్యాచ్‌లో ఆతిథ్య ఇంగ్లాండ్ జట్టు 5 వికెట్ల తేడాతో భారత్‌పై విజయం సాధించింది. టీమిండియా నిర్దేశించిన 371 పరుగుల విజయలక్ష్యాన్ని ఇంగ్లాండ్ 82 ఓవర్లలో 5 వికెట్లు కోల్పోయి ఛేదించింది. ఈ విజయంతో ఐదు మ్యాచ్‌ల సిరీస్‌లో ఇంగ్లాండ్ 1-0 ఆధిక్యంలో నిలిచింది. భారత బ్యాటర్లు రెండు ఇన్నింగ్స్‌లలోనూ సెంచరీలతో రాణించినప్పటికీ, బౌలర్ల వైఫల్యం జట్టు ఓటమికి దారితీసింది.

ఇంగ్లాండ్ అద్భుత చేజింగ్

371 పరుగుల లక్ష్యంతో రెండో ఇన్నింగ్స్ ఆరంభించిన ఇంగ్లాండ్ జట్టుకు ఓపెనర్లు జాక్ క్రాలీ (65 పరుగులు, 126 బంతుల్లో 7 ఫోర్లు), బెన్ డకెట్ 188 పరుగుల భాగస్వామ్యంతో శుభారంభం అందించారు. ముఖ్యంగా బెన్ డకెట్ చెలరేగి ఆడాడు. కేవలం 170 బంతుల్లోనే 21 ఫోర్లు, ఒక సిక్సర్‌తో 149 పరుగులు చేసి ఇంగ్లాండ్ విజయంలో కీలక పాత్ర పోషించాడు. క్రాలీ అవుటైన తర్వాత వచ్చిన ఓలీ పోప్ (8) త్వరగానే వెనుదిరిగినప్పటికీ, డకెట్ తన జోరు కొనసాగించాడు. ఈ దశలో డకెట్, హ్యారీ బ్రూక్ (0) వెంటవెంటనే అవుటవ్వడం కాస్త ఆందోళన కలిగించింది. అయితే, కెప్టెన్ బెన్ స్టోక్స్ (33 పరుగులు, 51 బంతుల్లో 4 ఫోర్లు) తో కలిసి జో రూట్ ఇన్నింగ్స్‌ను చక్కదిద్దే ప్రయత్నం చేశాడు. స్టోక్స్ అవుటైన తర్వాత, జో రూట్ (53 నాటౌట్, 84 బంతుల్లో 6 ఫోర్లు), వికెట్ కీపర్ జామీ స్మిత్ (44 నాటౌట్, 55 బంతుల్లో 4 ఫోర్లు, 2 సిక్సర్లు) అద్భుతమైన భాగస్వామ్యం నెలకొల్పి మరో వికెట్ పడకుండా జట్టును విజయతీరాలకు చేర్చారు. .

ఈ మ్యాచ్‌లో తొలుత బ్యాటింగ్ చేసిన భారత్ తమ తొలి ఇన్నింగ్స్‌లో 113 ఓవర్లలో 471 పరుగుల భారీ స్కోరు సాధించింది. అనంతరం ఇంగ్లాండ్ తమ మొదటి ఇన్నింగ్స్‌లో 100.4 ఓవర్లలో 465 పరుగులకు ఆలౌటైంది. ఆ తర్వాత రెండో ఇన్నింగ్స్ ప్రారంభించిన టీమిండియా 364 పరుగులకు ఆలౌట్ అయింది. 

మొత్తంగా, లీడ్స్ టెస్టు ఆద్యంతం ఉత్కంఠభరితంగా సాగింది. ఇరు జట్ల బ్యాటర్లు పరుగుల వరద పారించగా, బౌలర్లు కూడా కీలక సమయాల్లో వికెట్లు తీసి ఆకట్టుకున్నారు.