మమ్ముట్టికి ఏమైంది?... అనారోగ్యంపై స్నేహితుడి కీలక ప్రకటన

మలయాళ చిత్రసీమ అగ్ర కథానాయకుడు మమ్ముట్టి ఆరోగ్యం గురించి గత కొన్ని రోజులుగా వ్యాపిస్తున్న పుకార్లకు ఆయన సన్నిహితుడు, రాజ్యసభ సభ్యుడు జాన్ బ్రిట్టాస్ తెరదించారు. మమ్ముట్టి స్వల్ప అనారోగ్య సమస్యతో బాధపడుతున్న మాట వాస్తవమే అయినా, ప్రస్తుతం ఆయన క్షేమంగా ఉన్నారని, ఆందోళన చెందాల్సిన అవసరం లేదని బ్రిట్టాస్ స్పష్టం చేశారు.

జాన్ బ్రిట్టాస్ మాట్లాడుతూ, "మేమిద్దరం చాలా కాలంగా మంచి స్నేహితులం. అయితే, మా వ్యక్తిగత విషయాల గురించి మేం ఎప్పుడూ పెద్దగా మాట్లాడుకోం. కానీ, కొన్ని రోజులుగా ఆ వివరాలను కూడా పంచుకుంటున్నాం. మమ్ముట్టికి చిన్న అనారోగ్య సమస్య ఉంది. దానికి ఆయన ప్రస్తుతం చికిత్స తీసుకుంటున్నారు. ఆయన క్షేమంగానే ఉన్నారు. నేను ఇప్పుడే ఆయనతో ఫోన్‌లో మాట్లాడాను" అని తెలిపారు. ఈ ప్రకటనతో మమ్ముట్టి ఆరోగ్యంపై వస్తున్న ఊహాగానాలకు ముగింపు పలికినట్లయింది.

ఇటీవల మమ్ముట్టి తీవ్ర అనారోగ్యానికి గురయ్యారంటూ కొన్ని వార్తలు ప్రచారంలోకి రావడంతో ఆయన అభిమానులు తీవ్ర ఆందోళనకు గురయ్యారు. అయితే, ఈ కథనాలను మమ్ముట్టి యాజమాన్య బృందం కూడా కొట్టిపారేసింది. "మమ్ముట్టి ఆరోగ్యం గురించి జరుగుతున్న ప్రచారంలో ఎలాంటి నిజం లేదు. రంజాన్ పండుగ సమయంలో ఆయన షూటింగ్‌ల నుంచి విరామం తీసుకుని, వెకేషన్‌కు వెళ్లారు. విరామం అనంతరం తిరిగి వచ్చిన వెంటనే ఆయన, మోహన్‌లాల్‌తో కలిసి దర్శకుడు మహేశ్‌ నారాయణన్‌ తెరకెక్కించనున్న చిత్రంలో పాల్గొంటారు" అని ఆయన టీమ్ వివరించింది.

ఈ క్రమంలోనే, మమ్ముట్టి ఆరోగ్యం కోసం తోటి నటుడు మోహన్‌లాల్ శబరిమలలో ప్రత్యేక పూజలు నిర్వహించినట్లు కూడా వార్తలు వచ్చాయి. మమ్ముట్టి ఆరోగ్యం గురించి ఆందోళన చెందాల్సిన అవసరం లేదని, అలాంటి చిన్న చిన్న ఆరోగ్య సమస్యలు సహజంగానే వస్తుంటాయని మోహన్‌లాల్ కూడా పేర్కొన్నట్లు సమాచారం. ఈ పరిణామాల నేపథ్యంలో, మమ్ముట్టి ఆరోగ్యంపై అనవసరపు ఆందోళనలు విరమించుకోవాలని ఆయన శ్రేయోభిలాషులు కోరుతున్నారు.