సన్ రైజర్స్ ఓనర్ కావ్యతో పెళ్లంటూ వార్తలు... క్లారిటీ ఇచ్చిన అనిరుధ్!

ప్రముఖ సంగీత దర్శకుడు అనిరుధ్ రవిచందర్ తన పెళ్లి గురించి వస్తున్న వార్తలపై స్పష్టత ఇచ్చారు. సన్‌రైజర్స్ హైదరాబాద్ జట్టు సీఈవో కావ్య మారన్‌తో ప్రేమలో ఉన్నారని, త్వరలోనే పెళ్లి చేసుకోబోతున్నారంటూ కోలీవుడ్ మీడియాలోనూ, సామాజిక మాధ్యమాల్లోనూ జోరుగా ప్రచారం జరిగింది. ఈ వార్తలపై అనిరుధ్ తాజాగా సోషల్ మీడియా ద్వారా స్పందించారు.

గత కొంతకాలంగా అనిరుధ్, కావ్య మారన్ మధ్య ఏదో నడుస్తోందని, వారిద్దరూ వివాహ బంధంతో ఒక్కటి కాబోతున్నారని కథనాలు వెలువడ్డాయి. ఈ ప్రచారం సినీ వర్గాల్లో తీవ్ర చర్చనీయాంశంగా మారింది. అయితే, ఈ వార్తల్లో ఎలాంటి నిజం లేదని అనిరుధ్ తేల్చి చెప్పారు. "పెళ్లా..? దయచేసి ఇలాంటి రూమర్స్ ప్రచారం చేయడం ఆపండి" అంటూ ఆయన సోషల్ మీడియాలో ఒక పోస్ట్ పెట్టారు. 

కావ్య మారన్, సన్ గ్రూప్ ఛైర్మన్ కళానిధి మారన్ కుమార్తె అన్న విషయం తెలిసిందే. ఇండియన్ ప్రీమియర్ లీగ్ (ఐపీఎల్) మ్యాచ్‌ల సమయంలో సన్‌రైజర్స్ హైదరాబాద్ జట్టుకు మద్దతుగా మైదానంలో కనిపిస్తూ, తన హావభావాలతో ఆమె బాగా పాపులర్ అయ్యారు. మరోవైపు, కళానిధి మారన్ నిర్మించిన పలు విజయవంతమైన చిత్రాలకు అనిరుధ్ సంగీత దర్శకత్వం వహించారు. వీటిలో 'జైలర్', 'బీస్ట్', 'రాయన్' వంటి సినిమాలు ఉన్నాయి. ఈ నేపథ్యంలోనే వారిద్దరి మధ్య సాన్నిహిత్యం పెరిగిందనే ఊహాగానాలు మొదలయ్యాయి. అయితే, తాజా స్పందనతో ఆ ప్రచారానికి అనిరుధ్ ముగింపు పలికారు.