ట్రంప్, మస్క్ మధ్య విభేదాలపై స్పందించిన ఎలాన్ మస్క్ తండ్రి ఎరాల్ మస్క్

ప్రపంచ ప్రఖ్యాత వ్యాపారవేత్త ఎలాన్ మస్క్ తండ్రి ఎరాల్ మస్క్, రష్యా అధ్యక్షుడు వ్లాదిమిర్ పుతిన్‌పై ఆసక్తికర వ్యాఖ్యలు చేశారు. పుతిన్‌ను మంచి వ్యక్తిగా అభివర్ణించిన ఆయన, పాశ్చాత్య దేశాల మీడియా ఆయన గురించి తప్పుడు వార్తలు ప్రచారం చేస్తోందని ఆరోపించారు. ఈ వ్యాఖ్యలు ప్రస్తుతం సామాజిక మాధ్యమాల్లో వైరల్‌గా మారాయి.

రష్యాలో నిర్వహించిన "ఫోరం ఆఫ్ ద ఫ్యూచర్ 2050" అనే కార్యక్రమంలో ఎరాల్ మస్క్ పాల్గొన్నారు. ఈ సందర్భంగా మాట్లాడుతూ, "పుతిన్ చాలా నిలకడైన వ్యక్తి, ఒక మంచి మనిషి. కానీ పాశ్చాత్య మీడియా ఆయనతో పాటు రష్యా దేశంపై కూడా బురద చల్లే ప్రయత్నం చేస్తోంది. రష్యాను శత్రుదేశంగా చూపించడానికి నిజం కాని కథనాలను ప్రసారం చేస్తోంది. ఆయన గురించి వస్తున్న వార్తలన్నీ అర్థం లేనివి" అని ఎరాల్ మస్క్ పేర్కొన్నారు.

ట్రంప్, ఎలాన్ మస్క్‌ల మధ్య వివాదంపై స్పందన

అమెరికా అధ్యక్షుడు డొనాల్డ్ ట్రంప్, తన కుమారుడు ఎలాన్ మస్క్‌ల మధ్య నెలకొన్న విభేదాల గురించి కూడా ఎరాల్ మస్క్ స్పందించారు. గత కొన్ని నెలలుగా పాలనాపరమైన విషయాల్లో ఎలాన్ మస్క్, ట్రంప్ ఇద్దరూ తీవ్రమైన ఒత్తిడిని ఎదుర్కొంటున్నారని ఆయన అన్నారు.

ట్రంప్ తీసుకువచ్చిన ఒక బిల్లు విషయంలో ఎలాన్ మస్క్ తీవ్ర అసంతృప్తికి గురయ్యారని, అందుకే ట్రంప్‌పై ఆరోపణలు చేస్తున్నారని తెలిపారు. ఈ కారణంతోనే వారిద్దరి మధ్య మనస్పర్థలు వచ్చాయని వివరించారు. అయితే, వారిద్దరూ తమ మధ్య ఉన్న వివాదాలను పక్కన పెట్టి, కలిసి పని చేయాలని తాను కోరుకుంటున్నట్లు ఎరాల్ మస్క్ తన అభిప్రాయాన్ని వ్యక్తం చేశారు.