డ్రగ్స్‌ను దూరం పెట్టినట్లే వాటినీ దూరం పెట్టండి: తమిళ నటుడు విజయ్ పిలుపు

కులం, మతం వంటి అంశాలతో మనసులను కలుషితం చేసుకోవద్దని, వాటి ఆధారంగా జరిగే విభజనలను తిరస్కరించాలని తమిళగ వెట్రి కళగం (టీవీకే) అధినేత, ప్రముఖ సినీ నటుడు విజయ్ విద్యార్థులకు పిలుపునిచ్చారు. చెన్నైలో జరిగిన ఒక కార్యక్రమంలో పదో తరగతి, పన్నెండో తరగతి పరీక్షల్లో అత్యధిక మార్కులు సాధించిన విద్యార్థులను సత్కరించిన అనంతరం ఆయన ఈ వ్యాఖ్యలు చేశారు.

ఈ సందర్భంగా విజయ్ మాట్లాడుతూ, "ఈ ప్రకృతికి కులం, మతం ఉన్నాయా?" అని విద్యార్థులను ప్రశ్నించారు. ప్రజాస్వామ్యం అందరికీ సమాన అవకాశాలు కల్పించిందని, ప్రజాస్వామిక విలువలను పాటించాలని మీ కుటుంబ సభ్యులకు కూడా తెలియజేయాలని ఆయన కోరారు. అవినీతి కార్యకలాపాలకు దూరంగా ఉంటూ, విశ్వసనీయత కలిగిన వ్యక్తులకే ఓటు వేయాలని సూచించారు.

"కుల, మతాల ఆధారంగా జరిగే విభజనను తోసిపుచ్చండి. అలాంటి వాటితో మీ మనసు పాడుచేసుకోకండి. సూర్యుడు, వర్షం వంటి ప్రకృతి శక్తులకు ఈ భేదాలున్నాయా? డ్రగ్స్‌ను ఎలాగైతే దూరం పెడతారో, అలాగే కులం, మతం వంటి వాటిని కూడా దరిచేరనీయకండి. ప్రజాస్వామ్యం ఉన్నప్పుడే ఈ ప్రపంచంలో స్వేచ్ఛ ఉంటుంది" అని విజయ్ అన్నారు.

ఇదిలా ఉండగా, తమిళనాడులో వచ్చే ఏడాది అసెంబ్లీ ఎన్నికలు జరగనున్నాయి. ఈ నేపథ్యంలో టీవీకేతో పాటు ఇతర ప్రధాన రాజకీయ పార్టీలు కూడా ఇప్పటి నుంచే ఎన్నికల వ్యూహరచనలో నిమగ్నమయ్యాయి. రాష్ట్రంలో అధికారంలో ఉన్న డీఎంకే ప్రభుత్వాన్ని విజయ్ తీవ్రంగా వ్యతిరేకిస్తున్నారు. అదే సమయంలో బీజేపీ పైనా ఆయన విమర్శలు చేస్తున్నారు.