ఆక్టోపస్... పట్టు పట్టిందంటే వదలదు... వీడియో చూడండి!

సముద్ర జీవుల్లో ఆక్టోపస్ కు ప్రత్యేక స్థానం ఉంది. తనకున్న ఎనిమిది టెంటకిల్స్ (కరములు) తో ఇది ప్రదర్శించే చాకచక్యం గురించి ప్రత్యేకంగా చెప్పనక్కర్లేదు. తాజాగా, ఒక ఆక్టోపస్ అత్యంత నైపుణ్యంగా ఒక చేపను వేటాడి, క్షణాల్లో దాన్ని కబళించిన దృశ్యాలు సోషల్ మీడియాలో వైరల్ గా మారాయి. ఈ వీడియో చూసిన నెటిజన్లు ఆక్టోపస్ వేట తీరుకు ఆశ్చర్యపోతున్నారు.

వివరాల్లోకి వెళితే, సముద్ర గర్భంలో చిత్రీకరించినట్లుగా కనిపిస్తున్న ఈ వీడియోలో, ఒక ఆక్టోపస్ తన సమీపంలోకి వచ్చిన చేపను అత్యంత వేగంగా పసిగట్టింది. రెప్పపాటు కాలంలో తన టెంటకిల్స్ తో ఆ చేపను చుట్టుముట్టింది. ఆక్టోపస్ పట్టు ఎంత బలంగా ఉందంటే, చేప తప్పించుకోవడానికి ఏమాత్రం అవకాశం లభించలేదు. తన కబంధ హస్తాల్లో చిక్కిన చేపను అది ఏమాత్రం జాప్యం చేయకుండా కొద్ది క్షణాల్లోనే ఆహారంగా మార్చుకుంది.

ఆక్టోపస్ చేపను పట్టుకున్న విధానం, దాని వేగం, పట్టు బిగించిన తీరు చూపరులను ఎంతగానో ఆకట్టుకుంటున్నాయి. తన ఎనిమిది టెంటకిల్స్ ను ఏకకాలంలో ఉపయోగిస్తూ, ఎరను చాకచక్యంగా బంధించడం ఈ వీడియోలో స్పష్టంగా కనిపిస్తుంది. ఈ దృశ్యాలు చూసిన పలువురు నెటిజన్లు ఆక్టోపస్ ల వేట నైపుణ్యాలను ప్రశంసిస్తూ కామెంట్లు చేస్తున్నారు. ప్రకృతిలో జీవజాలం ఆహారం కోసం సాగించే పోరాటానికి ఇది నిదర్శనమని కొందరు పేర్కొంటున్నారు.