మరణించినా తెలుగుజాతి గుండె చప్పుడు ఎన్టీఆర్: పయ్యావుల కేశవ్

కడప జిల్లాలో జరుగుతున్న తెలుగుదేశం పార్టీ మహానాడు-2025 రెండో రోజు కార్యక్రమాలు ఉత్సాహంగా కొనసాగుతున్నాయి. మహానాడు రెండో రోజున జరిగిన సభలో పయ్యావుల కేశవ్ తన వాగ్దాటిని ప్రదర్శించారు. పార్టీలో కీలక నేతగా, మంచి వక్తగా, సమకాలీన అంశాలపై లోతైన విశ్లేషణ చేయగల నేతగా పేరున్న ఆయన.. మహానాడు వేదిక నుంచి పార్టీ కార్యకర్తలను, నాయకులను ఉద్దేశించి మాట్లాడారు. ఆయన తన ప్రసంగంలో ప్రధానంగా రాష్ట్రంలోని తాజా రాజకీయ పరిణామాలు, పార్టీ సంస్థాగత నిర్మాణం, ప్రజా సమస్యలు, ప్రభుత్వ వైఫల్యాలు వంటి అంశాలను ప్రస్తావించారు. పార్టీ శ్రేణులకు దిశానిర్దేశం చేసేలా, వారిలో నూతనోత్సాహం నింపేలా ఆయన ప్రసంగం సాగింది. 

పార్టీ వ్యవస్థాపక అధ్యక్షుడు నందమూరి తారకరామారావు జయంతిని పురస్కరించుకుని ఆయనకు నివాళులు అర్పిస్తూ రెండోరోజు కార్యక్రమం ప్రారంభమవుతున్నట్టు చెప్పారు. తెలుగు జాతి ఆత్మగౌరవాన్ని మహోన్నత శిఖరాలపై నిలబెట్టిన మహనీయుడు, మరణించినా తెలుగుజాతి గుండె చప్పుడుగా నిలిచిన మహోన్నతుడు, అనితర సాధ్యమైనటువంటి చరిత్ర సృష్టించిన ప్రజా నాయకుడు, తెలుగు గడ్డమీదే కాకుండా యావత్ దేశంలోనూ తెలుగు కీర్తిపతాకను రెపరెపలాడించిన మహోన్నతుడు, నిజాయతీ, నిబద్ధతకు నిలువెత్తు స్వరూపం, తెలుగుజాతి చరిత్రను తిరగరాసి, వారి జీవితాల్లో వెలుగు నింపిన మహానుభావుడు, బడుగు, బలహీన వర్గాలకు రాజకీయ అధికారాన్ని అందించిన మహోన్నతుడు ఎన్టీఆర్ అని కొనియాడారు. ఆయన నటించిన సినిమా సంచలనమని, ఆయన రాజకీయం రారాజకీయమని అన్నారు. అటువంటి మహానుభావుడికి ఘనమైన నివాళి అర్పిస్తున్నట్టు పేర్కొన్నారు.