హైదరాబాద్‌లో వర్షం.. పలుచోట్ల రోడ్లపై నీరు

పశ్చిమ బంగాళాఖాతంలో ఏర్పడిన అల్పపీడనం ప్రభావంతో తెలంగాణ రాష్ట్ర వ్యాప్తంగా వాతావరణం ఒక్కసారిగా చల్లబడింది. మంగళవారం పలు జిల్లాల్లో వర్షాలు కురుస్తుండగా, హైదరాబాద్ నగరంలో సాయంత్రం నుంచి వాతావరణం పూర్తిగా మారిపోయింది. నగరంలోని అనేక ప్రాంతాల్లో మోస్తరు వర్షపాతం నమోదైంది.

వివరాల్లోకి వెళితే, సికింద్రాబాద్, అల్వాల్, లింగంపల్లి, కూకట్‌పల్లి, జూబ్లీహిల్స్, సూరారం, బోరబండతో పాటు పలు ఇతర ప్రాంతాల్లో సాయంత్రం నుంచి వర్షం కురిసింది. ఆకస్మికంగా కురిసిన వర్షం కారణంగా పలు రోడ్లపై నీరు నిలిచిపోయింది. దీంతో వాహనదారులు గమ్యస్థానాలకు చేరుకోవడానికి కొంత ఇబ్బంది పడ్డారు. కొన్ని చోట్ల ట్రాఫిక్‌కు స్వల్ప అంతరాయం కలిగింది.