హర్యానాలో మద్యం షాపుపై కాల్పుల మోత.. హడలిపోయిన జనం

హర్యానాలోని యమునానగర్‌లో పట్టపగలే జరిగిన కాల్పుల ఘటన స్థానికులను తీవ్ర భయాందోళనకు గురిచేసింది. ఓ మద్యం దుకాణం వెలుపల ముసుగు ధరించిన ఆగంతకుడు విచక్షణారహితంగా కాల్పులకు తెగబడ్డాడు. ఈ ఘటనతో ఆ ప్రాంతంలో ఒక్కసారిగా కలకలం రేగింది. దుండగుడు సుమారు 12 రౌండ్లు కాల్పులు జరిపి, ఘటనా స్థలంలో ఓ బెదిరింపు లేఖను వదిలిపెట్టి పరారయ్యాడు.

విషయం తెలుసుకున్న వెంటనే పోలీసులు, క్రైమ్ బ్రాంచ్ బృందాలు ఘటనా స్థలానికి చేరుకున్నాయి. కాల్పుల కారణంగా మద్యం దుకాణం అద్దాల డోర్ పూర్తిగా ధ్వంసమైంది. అక్కడున్న సీసీటీవీ కెమెరాల్లో ఈ ఘటన రికార్డయింది. ఈ ఫుటేజీ ఆధారంగా నిందితుడిని గుర్తించి, అరెస్ట్ చేసేందుకు పోలీసులు గాలింపు చర్యలు చేపట్టారు.

ఈ కాల్పుల వెనుక గ్యాంగ్ తగాదాలు లేదా డబ్బుల కోసం బెదిరింపులకు పాల్పడే ముఠాల ప్రమేయం ఉండవచ్చనే కోణంలో పోలీసులు దర్యాప్తు చేస్తున్నారు. ప్రజలు ఎలాంటి ఆందోళనకు గురికావద్దని, దర్యాప్తునకు సహకరించాలని అధికారులు విజ్ఞప్తి చేశారు.

ఇటీవలి కాలంలో హర్యానాలో వివిధ నేరగాళ్ల ముఠాల ఆగడాలు పెరిగిపోయాయి. డబ్బుల కోసం బెదిరింపులు, హత్యలు అధికమయ్యాయి. గతేడాది డిసెంబర్‌లో యమునానగర్‌లోనే ఓ జిమ్ వెలుపల కారులో కూర్చున్న ముగ్గురు యువకులపై గుర్తుతెలియని దుండగులు కాల్పులు జరపడంతో ఇద్దరు అక్కడికక్కడే మృతి చెందారు. మరొకరు తీవ్రంగా గాయపడ్డారు. ఐదారుగురు వ్యక్తులు బైక్‌లపై వచ్చి ఈ దారుణానికి పాల్పడ్డారు. అంతకుముందు సెప్టెంబర్‌లో సోనిపట్‌లోని ఓ మద్యం దుకాణం వద్ద జరిగిన కాల్పుల ఘటనలో ముగ్గురు మరణించగా, ఇద్దరు గాయపడ్డారు.