జెప్టోపై ప్రత్యర్థి కుట్ర: సీఈవో ఆదిత్య పాలీచా సంచలన ఆరోపణలు

ప్రముఖ క్విక్ డెలివరీ సంస్థ జెప్టో సీఈవో, సహ వ్యవస్థాపకుడు ఆదిత్య పాలీచా సంచలన ఆరోపణలు చేశారు. తమ సంస్థను లక్ష్యంగా చేసుకుని ప్రత్యర్థి కంపెనీకి చెందిన చీఫ్ ఫైనాన్షియల్ ఆఫీసర్ (సీఎఫ్‌వో) గత కొన్ని రోజులుగా దుష్ప్రచారం సాగిస్తున్నారని ఆరోపించారు. ఈ మేరకు పాలీచా లింక్డ్‌ఇన్‌లో ఒక పోస్ట్ పెట్టారు.

తమ సంస్థ గురించి ఇన్వెస్టర్లకు ఫోన్లు చేసి ఎలాంటి ఆధారాలు లేకుండా ఆరోపణలు చేస్తున్నారని పాలీచా పేర్కొన్నారు. "జెప్టో గురించి తప్పుడు గణాంకాలు, నకిలీ ఎక్సెల్ షీట్లను తెలిసిన జర్నలిస్టుల ద్వారా ప్రచారం చేస్తున్నారు. సోషల్ మీడియాలో బాట్లకు డబ్బులిచ్చి మాపై వ్యతిరేక ప్రచారం చేయిస్తున్నారు" అని ఆవేదన వ్యక్తం చేశారు. అయితే, ఆ ప్రత్యర్థి కంపెనీ పేరును మాత్రం ఆయన వెల్లడించలేదు.

జెప్టో ఆర్థికంగా వేగంగా అభివృద్ధి చెందుతుండటం, ముఖ్యంగా తమ ఎబిట్డా (EBITDA) మెరుగుపడటం చూసి ప్రత్యర్థి కంపెనీ ఆందోళనకు గురవుతోందని పాలీచా పేర్కొన్నారు. "మే 2024లో నెలకు సుమారు రూ. 750 కోట్ల గ్రాస్ ఆర్డర్ వ్యాల్యూ (జీఓవీ) ఉండగా, మే 2025 నాటికి అది నెలకు రూ. 2,400 కోట్లకు పెరిగింది. జనవరి 2025 నుంచి మే 2025 మధ్య మా ఎబిట్డా 20 శాతం మెరుగుపడింది. ఇదే కాలంలో మా క్యాష్ బర్న్ (నగదు వ్యయం) సుమారు 65 శాతం తగ్గింది" అని ఆయన వివరించారు.

ప్రస్తుతం తమ వద్ద సుమారు రూ. 7,445 కోట్ల నికర నగదు నిల్వలున్నాయని, ప్రస్తుత నగదు వ్యయంతో చూస్తే చాలా ఏళ్ల వరకు కార్యకలాపాలకు ఇబ్బంది లేదని పాలీచా తెలిపారు. వచ్చే త్రైమాసికంలో తమ డార్క్ స్టోర్లలో చాలా వరకు పూర్తిస్థాయిలో ఎబిట్డా పాజిటివ్‌గా మారతాయని ఆశాభావం వ్యక్తం చేశారు. సదరు సీఎఫ్‌వో ఈ తరహా చర్యలను మానుకోవాలని హితవు పలికారు. "ఆరోగ్యకరమైన పోటీని మేం స్వాగతిస్తాం, కానీ అబద్ధాలను సహించం. మీ చర్యలు మేం బలమైన పోటీదారులమని పెట్టుబడిదారులకు మరింత స్పష్టం చేస్తున్నాయి. మనమందరం మన పనులపై దృష్టి సారిస్తే మంచిది" అని పాలీచా సూచించారు.