నూర్ అహ్మద్ కు 4 వికెట్లు... చెన్నై టార్గెట్ 180 రన్స్

చెన్నై సూపర్ కింగ్స్‌తో మ్యాచ్‌లో కోల్‌కతా నైట్ రైడర్స్ (కేకేఆర్) ఓ మోస్తరు స్కోరు సాధించింది. ఈడెన్ గార్డెన్స్ లో టాస్ గెలిచి తొలుత బ్యాటింగ్ ఎంచుకున్న కేకేఆర్ నిర్ణీత 20 ఓవర్లలో 6 వికెట్ల నష్టానికి 179 పరుగులు చేసింది. కెప్టెన్ అజింక్య రహానే (48 పరుగులు, 33 బంతుల్లో; 4 ఫోర్లు, 2 సిక్సర్లు) టాప్ స్కోరర్‌గా నిలిచాడు.

ఇన్నింగ్స్ ఆరంభంలో కేకేఆర్‌కు శుభారంభం దక్కలేదు. ఓపెనర్ రహ్మానుల్లా గుర్బాజ్ (11) త్వరగానే పెవిలియన్ చేరాడు. అనంతరం వచ్చిన సునీల్ నరైన్ (26 పరుగులు, 17 బంతుల్లో; 4 ఫోర్లు, 1 సిక్సర్) దూకుడుగా ఆడినా, నూర్ అహ్మద్ బౌలింగ్‌లో స్టంపౌట్ అయ్యాడు. ఆ తర్వాత క్రీజులోకి వచ్చిన అంగ్‌క్రిష్ రఘువంశీ (1) కూడా నిరాశపరిచాడు.

ఒక దశలో 71 పరుగులకే 3 వికెట్లు కోల్పోయి కష్టాల్లో పడిన కేకేఆర్‌ను కెప్టెన్ రహానే ఆదుకున్నాడు. అతనికి ఆండ్రీ రస్సెల్ (38 పరుగులు, 21 బంతుల్లో; 4 ఫోర్లు, 3 సిక్సర్లు), మనీష్ పాండే (36 నాటౌట్, 28 బంతుల్లో; 1 ఫోర్, 1 సిక్సర్) తోడవడంతో జట్టు స్కోరు 150 పరుగులు దాటింది. రహానే అర్ధశతకానికి చేరువలో రవీంద్ర జడేజా బౌలింగ్‌లో కాన్వేకు క్యాచ్ ఇచ్చి వెనుదిరిగాడు. చివర్లో రింకూ సింగ్ (9) వేగంగా ఆడే ప్రయత్నంలో నూర్ అహ్మద్ బౌలింగ్‌లోనే ఔటయ్యాడు. రమణ్‌దీప్ సింగ్ (4 నాటౌట్) అజేయంగా నిలిచాడు.

చెన్నై సూపర్ కింగ్స్ బౌలర్లలో ఆఫ్ఘన్ స్పిన్నర్ నూర్ అహ్మద్ అద్భుతంగా బౌలింగ్ చేసి 4 కీలక వికెట్లు పడగొట్టాడు. అన్షుల్ కాంభోజ్, రవీంద్ర జడేజా చెరో వికెట్ దక్కించుకున్నారు.