చైనా కీలక నిర్ణయం: కొన్ని అమెరికా వస్తువులపై సుంకాలు ఎత్తివేత?

అమెరికా, చైనాల మధ్య కొనసాగుతున్న వాణిజ్య యుద్ధం తీవ్రస్థాయికి చేరుకున్న తరుణంలో బీజింగ్ కొంత మెత్తబడినట్లు కనిపిస్తోంది. అమెరికా నుంచి దిగుమతి అయ్యే కొన్ని కీలక ఉత్పత్తులపై విధించిన 125 శాతం ప్రతీకార సుంకాలనుంచి మినహాయింపు ఇచ్చే అంశాన్ని చైనా ప్రభుత్వం పరిశీలిస్తున్నట్లు సమాచారం. ఇరు దేశాల మధ్య నెలకొన్న వాణిజ్య ఉద్రిక్తతలు కొన్ని రంగాలపై ప్రతికూల ప్రభావం చూపుతున్న నేపథ్యంలో ఈ నిర్ణయం ప్రాధాన్యత సంతరించుకుంది.

ప్రధానంగా అమెరికా నుంచి దిగుమతి చేసుకునే ఈథేన్ వంటి పారిశ్రామిక రసాయనాలు, కీలకమైన వైద్య పరికరాలు వంటి వాటిపై సుంకాలను సడలించాలని చైనా పరిశీలిస్తోంది. వీటితో పాటు విమానాల లీజులకు సంబంధించిన చెల్లింపులపైనా సుంకం మినహాయింపు ఇవ్వాలని బీజింగ్ యోచిస్తున్నట్లు సమాచారం.

చైనాలోని అనేక విమానయాన సంస్థలు థర్డ్ పార్టీ సంస్థల నుంచి విమానాలను లీజుకు తీసుకుని వాటికి చెల్లింపులు చేస్తుంటాయి. అయితే ప్రస్తుత వాణిజ్య యుద్ధం నేపథ్యంలో ఈ లీజు చెల్లింపులపై కూడా అదనపు సుంకాలు వర్తిస్తుండటం ఆయా సంస్థలకు ఆర్థికంగా భారంగా మారింది. ఈ సమస్యను పరిష్కరించే దిశగా సుంకాల మినహాయింపు ప్రతిపాదన తెరపైకి వచ్చినట్లు తెలుస్తోంది.

ఈ నెలలోనే ఇరు దేశాలు ఒకరి ఉత్పత్తులపై మరొకరు పోటీపడి సుంకాలు విధించుకున్నాయి. అమెరికా 145 శాతం సుంకాలు విధించగా, ప్రతిగా చైనా కూడా 125 శాతం వరకు సుంకాలను అమల్లోకి తెచ్చింది. ఈ క్రమంలో ఇరు దేశాల మధ్య చర్చలు జరుగుతున్నాయని అమెరికా అధ్యక్షుడు డొనాల్డ్ ట్రంప్ ఇటీవల ప్రకటించారు. అయితే ట్రంప్ ప్రకటనను చైనా తోసిపుచ్చింది. ఇరు దేశాల మధ్య ఎలాంటి అధికారిక సంప్రదింపులు జరగడం లేదని చైనా విదేశాంగ శాఖ ప్రతినిధి స్పష్టం చేశారు. ఈ నేపథ్యంలో కొన్ని వస్తువులపై సుంకాల మినహాయింపు దిశగా చైనా ఆలోచన చేయడం గమనార్హం.